Satara Municipal Budget – शहराच्या विकासाला चालना देणारे 597 कोटी रुपयांचे शिलकी अंदाजपत्रक शुक्रवार दि. २७ फेब्रुवारी रोजी सकाळी ११ वाजता नगरपालिकेच्या अर्थसंकल्पीय सभेत सादर केले जाणार आहे. तब्बल साडेचार वर्षानंतर लोकप्रतिनिधींना हे बजेट सादर करण्याची संधी मिळाली असून उपनगराध्यक्ष दत्ता बनकर यातील तरतुदींचे वाचन करणार आहेत. सातारा शहराच्या आणि हद्दवाढ क्षेत्रातील पायाभूत सुविधांसाठी अनेक तरतुदी करण्यात आल्या आहेत. त्या तरतुदी काय असणार आहेत याची सातारकरांना उत्सुकता आहे. यावर्षीचे बजेट काटकसरीचे असणार असून संपूर्ण शहराचा अर्थसंकल्प साधारण 597 कोटीचा असल्याची माहिती आहे. महसुली जमा आणि भांडवली जमा शिवाय महसुली खर्च ही कसरत सातारा पालिकेने पुन्हा एकदा साडेचार लाखांची शिल्लक दाखवून तरतुदींचे नियोजन जुळवले आहे. सर्वात महत्त्वाचे आरोग्य आणि पाणीपुरवठा ही दोन महत्त्वाची सेवाक्षेत्रे 182 टक्के तुटीमध्ये असल्याचा उल्लेख अंदाजपत्रकात असून आस्थापना खर्च हा प्रमाणाबाहेर झाल्याचे निरीक्षण अंदाजपत्रकात नोंदवले गेले आहे. सातारा नगरपालिकेचा मूळ महसूल सहाय्यक अनुदाने आणि प्रत्यक्ष मिळणारी अनुदाने यावरून 597 कोटी रुपयांचे बजेट सादर होईल. गेल्या चार वर्षापासून प्रशासक या नात्याने मुख्याधिकारी अभिजित बापट हेच बजेट सादर करत होते. स्थायी समितीच्या होणाऱ्या पहिल्याच सभेमध्ये पदसिद्ध अध्यक्ष नगराध्यक्ष अमोल मोहिते यांच्यासमोर हे बजेट सादर होणार असून त्यावर साधक बाधक चर्चा केली जाणार आहे. नगराध्यक्ष या बजेटचा आढावा घेणार असून त्यामधील अनेक तरतुदींवर सखोल चर्चा होईल. त्यानंतर स्थायी समितीचे सदस्य व पाणीपुरवठा समितीचे पदसिद्ध सभासद ॲड. दत्ता बनकर सर्वसाधारण सभेपुढे हे बजेट सादर करतील. चार प्रशासकीय अंदाजपत्रकांची माहिती सभागृहाला दिली जावी अशी मागणी नगरसेवकांमधून होण्याची शक्यता आहे.
