सातारा- भारतीय जनता पार्टीचे स्टार प्रचारक शिवेंद्रसिंहराजे भोसले यांनी तब्बल 21 कोपरासभा आणि पहिल्याच टप्प्यांमध्ये दररोज सरासरी साडेसात किलोमीटरची पायपीट करत प्रचाराची राळ उडवून दिली आहे. खासदार उदयनराजे भोसले यांच्या गैरहजेरीमध्ये सातारा शहरात दोन्ही आघाड्यांचे स्टार प्रचारक म्हणून सबकुछ शिवेंद्रसिंहराजे असे चित्र सध्या दिसून येत आहे . शिवेंद्रसिंहराजे यांच्या राजकीय प्रगल्भतेची चुणूक सध्या सातारा शहराच्या राजकारणात दिसून येत आहे. मनोमिलनाच्या वाटाघाटीमध्ये दोन पावले पुढे राहून शहराच्या राजकारणावर पकड निर्माण करण्यात शिवेंद्रसिंहराजे यांना यश आले आहे. सातारा जिल्ह्याचे निवडणूक प्रमुख म्हणून मुख्यमंत्री देवेंद्र फडणवीस यांनी शिवेंद्रसिंहराजे यांना चांगलीच ताकद दिली आहे. आजपर्यंत सातारा शहराच्या राजकारणात खा. उदयनराजे भोसले यांची नगरपालिका निवडणुकांच्या निमित्ताने चलती असायची. त्यांचे कॉलर प्रेम, दबंग अंदाज साऱ्यांना सुखवायचा. दोन-चार प्रभागातील त्यांची पदयात्रा म्हणजे तिथले राजकीय वारे फिरलेले असायचे. मात्र प्रकृती अस्वास्थ्यामुळे सध्या उदयनराजे नगरपालिका निवडणुकांच्या प्रचारापासून दोन हात लांब आहेत. मात्र त्यांचे धाकटे बंधू शिवेंद्रसिंहराजे यांनी दोन्ही आघाड्यांचा समन्वय ठेवत संतुलित प्रचारावर भर दिला आहे. भाजपचे उमेदवार हे एकच सूत्र डोळ्यासमोर ठेवून शिवेंद्रसिंहराजे यांच्या आतापर्यंत 41 कोपरा सभा आणि दररोजचे साडेसात ते दहा किलोमीटर सरासरी चालणे असा सातारा शहराचा कानाकोपरा त्यांनी पिंजून काढला आहे. सातारा शहरांमधील महिला मतदारांची संख्या ही जास्त असल्याने महिला मतदारांशी आवर्जून संवाद साधत भारतीय जनता पार्टीचा उमेदवार का ? तसेच सातारा शहरातील पुढील पाच वर्षाची व्हिजन यावर शिवेंद्रसिंहराजे चर्चा करत आहेत. कुठेही उमेदवाराला राजकीय रसद कमी पडू नये याची जातीने काळजी घेत आहेत. सध्या सातारा शहरांमध्ये भगव्या टोप्या आणि भाजपचे गमछे घातलेले राजकीय कार्यकर्ते जागोजागी दिसून येत आहेत. तसेच उमेदवारांचा प्रचार करताना अपक्ष उमेदवारांना परखड तंबी द्यायला सुद्धा शिवेंद्रसिंहराजे यांनी कमी केलेले नाही. राजकीय लगीनघाईत वधु पित्याची घालमेल ना. शिवेंद्रसिंहराजे भोसले यांच्या कन्या ऋणाली राजे यांचा विवाह सोहळा पुढील आठवड्यामध्ये होत आहे. घरची लगीनघाई असताना राजकीय लगीनघाई मध्ये रमलेले शिवेंद्रसिंहराजे सध्या सातारा शहरात कौतुकाचा विषय ठरत आहेत.शिवेंद्रसिंहराजे यांच्या पत्नी वेदांतिकाराजे भोसले यांनी सुद्धा आपल्या पतीची राजकीय जबाबदारी ओळखून घरच्या लगीन घाईचा एक हाती कारभार स्वतःच्या खांद्यावर घेतला आहे. कन्येच्या विवाह सोहळ्याच्या तयारीत कुठेही काही कमी पडू नये याची जातीने काळजी घेत वहिनीसाहेब पदर खोचून जबाबदाऱ्या पेलण्यासाठी सज्ज आहेत. मुख्यमंत्री देवेंद्र फडणवीस यांच्याकडून दखल मनोमिलनाच्या कार्यकर्त्याला कुठेही बॅकफूटवर जाऊ लागू नये याकरता शिवेंद्रसिंहराजे हे दक्ष आहेत. त्यांच्या कामाचा राजकीय झपाटा याची दखल खुद्द मुख्यमंत्री देवेंद्र फडणवीस यांनी घेतली आहे. लाडाकोडाने वाढवलेली लेक विवाह सोहळ्यानंतर पतीच्या घरी जाणार आहे. त्यामुळे शिवेंद्रसिंहराजे यांच्यातील वधूपिता कन्येचे कोड कौतुक करण्यात रमायला हवा. मात्र शिवेंद्रसिंहराजे यांची राजकीय धावपळ सातत्याने सुरू आहे. घरच्या जबाबदारी बरोबर साताऱ्याची पण जबाबदारी हे संतुलन शिवेंद्रसिंहराजे यांनी साधत मुरब्बीपणा काय असतो हे दाखवून दिले आहे .
