बीड : मस्साजोगचे सरपंच संतोष देशमुख हत्या प्रकरणात (Santosh Deshmukh Case) रोज नवनवीन अपडेट समोर येताना दिसत आहे. सुग्रीव कराडच्या सांगण्यावरून झालेल्या मारहाणीमुळे सुदर्शन घुले याला वाल्मीक कराडने बदला घ्यायला सांगितलं, असा खुलासा जयराम चाटेने केला होता. आता या प्रकरणात (Santosh Deshmukh Case) आणखी एक ट्विस्ट आला आहे. यामुळे वाल्मिक गँगच्या अडचणी वाढण्याची शक्यता आहे. टपरीवर चहा पिणाऱ्या प्रत्यक्षदर्शीने दिला जबाब सरपंच देशमुख हत्या प्रकरणात आवादा एनर्जी कंपनीबाहेर चहाच्या टपरीवर चहा पिणाऱ्या प्रत्यक्षदर्शीचा जबाब महत्त्वाचा ठरला. ६ डिसेंबर 2024 रोजी दुपारी साडेबारा वाजता सुदर्शन घुले त्याच्या साथीदारासोबत आवादा एनर्जी कंपनीच्या गेटवर पोहोचला. या दरम्यान त्याने गेटवरील वॉचमनला शिवीगाळ केली. त्याचवेळी कंपनीचे अधिकारी शिवाजी थोपटे तिथे दाखल झाले त्यांना सुदर्शन घुलेने वाल्मीक कराडचा माणूस आहे. कंपनी सुरू ठेवायची असेल तर दोन कोटी रुपये खंडणी अण्णाला द्या, अशी धमकी दिली. हे पण वाचा : संतोष देशमुख प्रकरणात एन्ट्री झालेला “सुग्रीव कराड’ कोण? मूळचा मुंडेंचा माणूस… पण ‘त्या’ एका गोष्टीमुळे वैर यानंतर त्या ठिकाणी सरपंच देशमुख घटनास्थळावर दाखल झाले आणि सुदर्शन घुले आणि त्याच्या साथीदाराला कंपनी बंद करू नका, गावातील लोकांना रोजगार मिळू द्या अशी विनंती करू लागले. मात्र सुदर्शन घुलेने सरपंच तुला बघून घेऊ तुला जिवंत सोडणार नाही, अशी धमकी दिली होती असा जबाब त्याठिकाणी चहा पिणाऱ्या प्रत्यक्षदर्शीने दिला आहे. या जबाबामुळे आरोपींच्या अडचणीत वाढ होण्याची शक्यता आहे. देशमुखाचें अपहरण कसे केले? संतोष देशमुख यांच्या अपहरण प्रकरणात उमरी टोल नाक्यावर सरपंचाची गाडी अडवल्यानंतर ड्राईवर साईटच्या काचेवर सुधीर सांगळे याने दगड मारला होता. दगड मारून संतोष देशमुख यांची गाडी अडवण्यात आली होती. त्यानंतर सुदर्शन घुले याने डाव्या बाजूचा दरवाजा उघडून सरपंच देशमुख (Santosh Deshmukh Case) यांना कॉलर धरून बाहेर खेचलं. जयराम चाटे याने त्याच्या हातातील कोयत्याने इंडिगो गाडीचा चालक शिवराज देशमुख याला धमकावलं. तसेच बळजबरीने मारहाण करत स्कार्पिओ गाडीत संतोष देशमुख यांना बसून अपहरण केलं. सुदर्शन घुले हि कार चालवत होता.
