Crime : जमिनीच्या हक्कासाठी मामाचा काढला काटा; भाच्याने मित्रांच्या मदतीने रचला हत्येचा कट
Crime : भोर तालुक्यातील सांगवी बुद्रुक येथे पोलीस पाटील अशोक येनपूरे यांच्या हत्या प्रकरणात राजगड पोलिसांनी तिघांना अटक केली. न्यायालयाने २३ नोव्हेंबरपर्यंत पोलीस कोठडी सुनावली.

Crime : भोर तालुक्यातील सांगवी बुद्रुक येथील पोलीस पाटील अशोक साधू येनपूरे यांच्या हत्या प्रकरणात राजगड पोलिसांनी तिघांना अटक केली आहे. वडिलोपार्जित जमिनीच्या हक्कसोडपत्रावरून झालेल्या वादातून येनपूरे यांची हत्या झाल्याचा आरोप आहे. अटक केलेल्या तिघांना न्यायालयाने २३ नोव्हेंबर २०२६ पर्यंत पोलीस कोठडी सुनावली आहे.
१६ नोव्हेंबर रोजी सायंकाळी ६ वाजण्याच्या सुमारास सांगवी बुद्रुक गावातील लमनदेव मंदिराजवळ ही घटना घडली. अशोक येनपूरे (वय ५०) हे शेतातून मोटारसायकलवरून घरी जात असताना आरोपींनी त्यांना अडवले. त्यानंतर डोक्यावर, उजव्या कानाजवळ आणि उजव्या हाताच्या दंडावर कोयत्याने वार केले. गंभीर जखमी झालेल्या येनपूरे यांचा मृत्यू झाला.
या प्रकरणी मुलगा शुभम अशोक येनपूरे यांनी राजगड पोलीस ठाण्यात फिर्याद दिली. त्यानुसार भारतीय न्याय संहिता कलम १०३(१), ३(५) आणि शस्त्र अधिनियमातील संबंधित कलमांनुसार गुन्हा दाखल करण्यात आला.
पोलिसांनी १८ नोव्हेंबर रोजी प्रतीक रामदास शेजवळ (२२, रा. सांगवी बुद्रुक), प्रणव उर्फ सोन्या कैलास गोगावले (१९) आणि प्रशांत उर्फ प्रज्वल उर्फ भैज्या संतोष गोगावले (१८ वर्षे ४ महिने, दोघे रा. गोगलवाडी, हवेली) यांना अटक केली.
आरोपींच्या अटकेच्या मागणीसाठी ग्रामस्थांनी राजगड पोलीस ठाण्यासमोर आंदोलन केले होते. आरोपींना लवकर अटक न झाल्यास पुणे-सातारा महामार्ग रोखण्याचा इशाराही देण्यात आला होता.
वरिष्ठ अधिकाऱ्यांच्या मार्गदर्शनाखाली तपास –
ही कारवाई पुणे ग्रामीण पोलीस अधीक्षक संदीप गिल्ल, अपर पोलीस अधीक्षक बारामती विभाग गणेश बिरादार, भोर विभागाचे पोलीस अधिकारी राजसिंग गौरी यांच्या मार्गदर्शनाखाली करण्यात आली. तसेच राजगड पोलीस ठाण्याचे पोलीस निरीक्षक संतोष जाधव, सहाय्यक पोलीस निरीक्षक चेतन मछले, पोलीस हवालदार निलेश राणे, विलास प्रधान, राज मुंढे, पोलीस कॉन्स्टेबल राजेंद्र गव्हाणे आणि भालेराव यांनी या तपासात सहभाग घेतला.
या प्रकरणाचा पुढील तपास सहाय्यक पोलीस निरीक्षक चेतन मछले करीत असून, हत्येमागील कारण आणि आरोपींची भूमिका तपासली जात आहे. प्रतीक शेजवळ हा मृत येनपूरे यांचा भाचा असून जमीनीच्या वादातून ही घटना घडल्याची माहिती समोर येत आहे.





