Sangli Crime : सांगली जिल्ह्यातील जत येथील एका जुन्या दुहेरी खून प्रकरणातील मुख्य साक्षीदाराचे अपहरण करून त्याची हत्या केल्याची खळबळजनक घटना उघडकीस आली आहे. या प्रकरणी कवठेमहांकाळ पोलिसांनी अत्यंत वेगाने तपास करत मुख्य ३ आरोपींना अवघ्या १२ तासांत बेड्या ठोकल्या आहेत. (Sangli Crime) ज्ञानू अण्णाप्पा खोत (वय २५, रा. कोगनोळी), रोहित बाळासाहेब पाटोळे (वय २५, रा. करोली (टी) शिवसेना युवासेना कवठेमहांकाळ शहरप्रमुख), हर्षद दाजी पैलवान (वय ३०, रा. तासगाव/कवठेमहांकाळ) या तिघांना अटक केली आहे. या व्यतिरिक्त सुयश उर्फ स्वप्नील किसन खुळे (रा. मंगळवेढा) आणि अमर खताळ (रा. इचलकरंजी) हे दोन संशयित सध्या फरारी असून पोलीस त्यांचा शोध घेत आहेत. (Sangli Crime) याबाबत मिळालेल्या माहितीनुसार, जत तालुक्यातील कोसारी येथील दादासो नामदेव यमगर (वय ५०) हे जुन्या एका दुहेरी खून प्रकरणातील (जत पोलीस ठाणे गु.र.नं. २३४/२०१८) मुख्य साक्षीदार होते. ५ मे २०२६ रोजी सकाळी ते सांगली येथील न्यायालयात साक्ष देण्यासाठी जात असताना, नागज फाटा येथून एका पांढऱ्या रंगाच्या बोलेरो गाडीतून (एम एच १३ एयू ६६५४) आलेल्या अज्ञातांनी त्यांचे अपहरण केले होते. (Sangli Crime) अपहरण केल्यानंतर संशयितांनी दादसो यमगर यांना कर्नाटक राज्यातील अथणी जवळील मदभावी (निलनगे वस्ती) येथील एका शेतात नेले. तिथे त्यांची हत्या करून, हा प्रकार खुनाचा नसून आत्महत्या आहे, असा बनाव रचण्यासाठी त्यांचा मृतदेह झाडाला गळफास लावलेल्या स्थितीत लटकवून दिला. कवठेमहांकाळ पोलीस ठाण्यातील डीबी पथकातील श्रीमंत करे यांना मिळालेल्या माहितीच्या आधारे पोलीसांनी तांत्रिक तपास करत या बनावाचा पर्दाफाश केला. या गुन्ह्याचा तपास कोल्हापूर परिक्षेत्राचे विशेष पोलीस महानिरीक्षक सुनील फुलारी, सांगलीचे पोलीस अधीक्षक तुषार दोषी, अपर पोलीस अधीक्षक कल्पना बारवकर आणि उपअधीक्षक सचिन थोरबोले यांच्या मार्गदर्शनाखाली करण्यात आला. (Sangli Crime) कवठेमहांकाळ पोलीस ठाण्याचे पोलीस निरीक्षक प्रविणकुमार कांबळे, सहायक पोलीस निरीक्षक दत्तात्रय कोळेकर, अमोल शिवशरण, पोलीस उपनिरीक्षक वैभव पाटील, भापकर, पोलीस हेड कॉन्स्टेबल श्रीमंत करे, नागेश मासाळ, निवृत्ती कारंडे, अभिजीत कासार, गोसावी, शितल जाधव या कर्मचाऱ्यांनी ही धडक कारवाई केली. “साक्षीदारावर दबाव आणण्यासाठी आणि पुराव्याचा नाश करण्यासाठी हे टोकाचे पाऊल उचलण्यात आले होते. परंतु, पोलिसांनी तातडीने कारवाई करत आरोपींना जेरबंद केले आहे.” -जिल्हा पोलीस अधीक्षक तुषार दोशी
