Sangamner: संगमनेर शहरातील तलाठी कार्यालयातील कामकाजाबाबत गंभीर गैरप्रकार उघडकीस आला असून, तलाठी अनुपस्थित असताना खासगी व्यक्तींकडून शासकीय कागदपत्रे हाताळली जात असल्याचा धक्कादायक प्रकार समोर आला आहे. आमदार अमोल खताळ यांच्या अचानक भेटीत हा प्रकार उघड झाला. नागरिकांना कामासाठी वारंवार कार्यालयाचे फेरे मारावे लागत असल्याची तसेच अडवणूक करून पैसे मागितले जात असल्याची तक्रार एका महिलेने आमदार खताळ यांना ‘व्हॉट्सअॅप’द्वारे केली होती. या तक्रारीची दखल घेत आमदारांनी तत्काळ तलाठी कार्यालयाला भेट दिली. भेटीदरम्यान कार्यालयात तलाठी व कोतवाल अनुपस्थित असल्याचे आढळले. मात्र, त्या ठिकाणी मन्सूर शेख हा खासगी व्यक्ती बसून शासकीय कागदपत्रे हाताळत असल्याचे निदर्शनास आले. त्याचवेळी उपस्थित असलेल्या दुसऱ्या व्यक्तीने स्वतःला शेख यांचा जावई असल्याचे सांगितले. या प्रकारावर संतप्त प्रतिक्रिया व्यक्त करत आमदार खताळ यांनी संबंधितांना जाब विचारला. “तलाठी नसल्याने आम्हीच काम पाहत होतो,” असे उत्तर संबंधितांकडून देण्यात आले. यावर आमदारांनी हा प्रकार गंभीर व बेकायदेशीर असल्याचे स्पष्ट करत तात्काळ कारवाईचे आदेश दिले. घटनेची माहिती मिळताच प्रांताधिकारी अरुण उंडे व तहसीलदार धीरज मांजरे यांना दूरध्वनीद्वारे सूचना देण्यात आल्या. प्रशासनाने तत्काळ नायब तहसीलदार भांगरे यांना घटनास्थळी पाठवून संबंधित दोघांवर कारवाई केली. तसेच, त्यांना पुढे कार्यालयात बसण्यास मनाई करण्याचे आदेश देण्यात आले. या प्रकरणामुळे महसूल विभागाच्या कामकाजावर गंभीर प्रश्नचिन्ह निर्माण झाले असून, कार्यालयीन शिस्त आणि पारदर्शकतेबाबत प्रशासनाने अधिक दक्षता घेण्याची गरज व्यक्त होत आहे.