Politics News : राज्यातील स्थानिक स्वराज्य संस्थांच्या निवडणुकांनंतर शिवसेना ठाकरे गटाला पुन्हा एकदा गळती लागल्याचे दिसून येत आहे. पक्षातील काही पदाधिकारी आणि कार्यकर्ते राजीनामा देत इतर पक्षांत प्रवेश करत असल्याचे चित्र दिसत आहे. विदर्भातील बुलढाणा जिल्ह्यात ठाकरे गटाचे जिल्हा समन्वयक असलेले संदीप शेळके यांनी आपल्या पदाचा राजीनामा देत कार्यकर्त्यांसह काँग्रेसमध्ये प्रवेश केला आहे. हा पक्षप्रवेश सोहळा मुंबई येथे पार पडला. यावेळी काँग्रेसचे प्रदेशाध्यक्ष यांच्या उपस्थितीत संदीप शेळके आणि त्यांच्या समर्थकांनी काँग्रेसमध्ये प्रवेश केला. महाराष्ट्र काँग्रेसच्या अधिकृत सोशल मीडिया अकाउंटवरून या पक्षप्रवेशाची माहिती देण्यात आली आहे. गेल्या काही दिवसांपासून संदीप शेळके ठाकरे गटाला ‘जय महाराष्ट्र’ करणार असल्याच्या चर्चा जिल्ह्यात रंगल्या होत्या. अखेर त्यांनी जिल्हा समन्वयक पदाचा राजीनामा देत काँग्रेसमध्ये जाण्याचा निर्णय घेतला. या घडामोडीमुळे बुलढाणा जिल्ह्यातील ठाकरे गटाला धक्का बसल्याची चर्चा राजकीय वर्तुळात सुरू आहे.
