Ashok Saraf : मराठी सिनेसृष्टीतील ज्येष्ठ अभिनेते अशोक सराफ यांना पद्मश्री पुरस्काराने गौरव करण्यात आले. अशोक सराफ यांना सर्वजण अशोक मामा अशी हाक देतात. अशोक सराफ यांनी मराठीबरोबरच हिंदी चित्रपटातही काम केले आहे. अनेक हिट चित्रपट त्यांनी मराठी आणि हिंदी या भाषांमध्ये दिलेले आहेत. त्यामुळे त्यांचा चाहतावर्ग मोठा आहे. नुकतेच एका मुलाखती दरम्यान अशोक सराफ यांनी बॅालिवूडचा अभिनेता सलमान खान याच्यासोबतच्या एका सीनचा थरारक अनुभव शेअर केला आहे.

एका सीनच्या शूटिंगदरम्यान सलमान खानच्या एका चुकीमुळे त्यांचा जीव गेला असता, पण ते थोडक्यात वाचले अशी आठवण अशोक सराफ यांनी एका मुलाखतीवेळी सांगितली. रेडिओ नशाला दिलेल्या मुलाखतीत त्यांनी याबाबत सांगितले आहे. जागृती (1992) नावाच्या चित्रपटात अशोक सराफ यांनी खलनायकाची भूमिका साकारलेली होती. या चित्रपटाच्या सीनदरम्यान एक थरराक घटना घडली होती.

सीनवेळी काय घडलं होतं? 

या चित्रपटाच्या एका सीनदरम्यान अशोक सराफ यांच्या मानेवर सलमानला चाकू ठेवायचा होता आणि त्यांना घट्ट पकडून ठेवायचं होतं. सीन सुरू झाला पण सलमानला हे माहित नव्हतं की हा चाकू खरा आहे. याविषयीची आठवण सांगताना ते म्हणाले, “त्याने माझ्या मानेवर चाकू घट्ट धरून ठेवला होता आणि तो चाकू घट्ट होता. त्याचं जे टोक होतं ते माझ्या मानेला लागलं. जसं मी संवाद म्हणायला सुरुवात केली तसं मी त्याच्या हातातून सुटण्याचा प्रयत्न केला. पण सलमानने मला घट्ट पकडून ठेवला होतं. तेव्हा मी त्याला सांगितलं की मला चाकू अलगद धर मला तो मानेला लागतो आहे. ”

…अन् शुटिंग पूर्ण झालं

अशा परिस्थितही या चित्रपटाचे शुटिंग सुरू राहिले. त्यानंतर जेव्हा मी हा सीन पाहिला, त्यावेळी मला माझ्या मानेवर खोल जखम झाली असल्याचे दिसले. जर चुकूनही माझी नस कापली गेली असती, तर कदाचित तिथेच मी गेलो असतो, अशी थरारक आठवण अशोक सराफ यांनी सांगितली.