कोल्हापूर – प्रेमविवाह केल्याच्या रागातून सख्ख्या भावाने बहिणीवर धारदार विळ्याने हल्ला करून गंभीर जखमी केले. हा प्रकार पन्हाळ्याच्या पायथ्याशी असलेल्या गुढे येथे सकाळी घडला. या प्रकरणी नागेश पांडुरंग तेली (वय 20, रा. निगवे दुमाला ता. करवीर) याला पन्हाळा पोलिसांनी ताब्यात घेतले आहे. या बाबत जखमी विश्रांती अविनाश चिखलकर (23, रा. गुढे ता. पन्हाळा) यांनी पन्हाळा पोलिस ठाण्यात फिर्याद दिली आहे. याची दखल घेत पन्हाळा पोलिसांनी दोन तासात संशयित नागेशला निगवे येथील घरातून ताब्यात घेतले. जखमी विश्रांती हिच्या पाठीत व उजव्या हातावर गंभीर दुखापत झाली आहे. तिला पन्हाळा ग्रामीण रुग्णालयात दाखल केले आहे. सख्ख्या भावाकडून शांत डोक्याने झालेल्या कृत्याने गुढे परिसरात भीतीचे वातावरण पसरले आहे. हा हल्ला सकाळी दहाला झाला. गुढेचे पोलिसपाटील केशव कदम यांनी पन्हाळा पोलिस ठाण्यात वर्दी दिली.
