Currency Market : डॉलरसमोर रुपया सात महिन्यांतील सर्वोच्च स्तरावर 93 रुपयांच्या खाली पोहोचला
Currency Market : भारतीय रुपया डॉलरच्या तुलनेत ९३ रुपयांच्या खाली पोहोचला. परदेशी गुंतवणूकदारांची खरेदी आणि डॉलरमधील घसरणीमुळे रुपयाला मोठा आधार मिळाला.

Currency Market : भारतीय रुपयाने शुक्रवारी (२० नोव्हेंबर) अमेरिकी डॉलरच्या तुलनेत मोठी सुधारणा नोंदवली. एप्रिलनंतर प्रथमच रुपयाचे मूल्य एका डॉलरमागे ९३ रुपयांच्या खाली गेले. त्यामुळे रुपया सात महिन्यांतील सर्वोच्च स्तरावर पोहोचला आहे. दिवसभराच्या व्यवहारात रुपयाने ९२.८२ ते ९२.९९५० या पातळीपर्यंत मजल मारली.
रुपयाच्या मजबुतीमागे परदेशी गुंतवणूकदारांचा भारतीय शेअर बाजारातील वाढता ओघ हे प्रमुख कारण आहे. नोव्हेंबर महिन्यात आतापर्यंत परदेशी गुंतवणूकदारांनी भारतीय शेअर बाजारात १२ अब्ज डॉलरपेक्षा अधिक गुंतवणूक केली आहे. याशिवाय निर्यातदारांकडून डॉलरची विक्री आणि आंतरराष्ट्रीय बाजारात डॉलरच्या निर्देशांकातील घसरण यामुळेही रुपयाला आधार मिळाला.
गुरुवारी परदेशी गुंतवणूकदारांनी भारतीय शेअर बाजारात सुमारे ७,४११ कोटी रुपयांची गुंतवणूक केली. तसेच सोने आणि चांदीच्या किमतीतील घसरणीमुळे आयातीसाठी लागणाऱ्या डॉलरच्या मागणीवरही परिणाम होण्याची शक्यता आहे.
मात्र, कच्च्या तेलाच्या किमती, अमेरिकेच्या मध्यवर्ती बँकेचे व्याजदरविषयक धोरण आणि जागतिक बाजारातील घडामोडी यांचा रुपयावर परिणाम होऊ शकतो. त्यामुळे रुपयाची ही तेजी कायम राहणार का, याकडे बाजाराचे लक्ष लागले आहे.





