Rohit Sharma Eden Gardens IPL Record : टीम इंडियाचा स्टार फलंदाज आणि मुंबई इंडियन्सचा माजी कर्णधार रोहित शर्मा याच्यासाठी कोलकात्याचे ‘ईडन गार्डन्स’ मैदान एकेकाळी कमालीचे लकी मानले जात होते. याच मैदानावर रोहितने २०१४ मध्ये श्रीलंकेविरुद्ध १७३ चेंडूंत २६४ धावांची ऐतिहासिक खेळी साकारत वनडे क्रिकेटमधील सर्वोच्च वैयक्तिक धावसंख्येचा जागतिक विक्रम रचला होता. मात्र, गेल्या काही वर्षांत याच ईडन गार्डन्सवर ‘हिटमॅन’ रोहित शर्माला जणू कोणाची तरी नजर लागली आहे. विशेषतः आयपीएलमध्ये या मैदानावर पाऊल ठेवताच रोहितच्या बॅटला जणू ग्रहण लागत आहे. २०१७ नंतर ईडन गार्डन्सवर धावांचा दुष्काळ! आयपीएल २०२६ मध्ये २० मे रोजी मुंबई इंडियन्स (MI) आणि कोलकाता नाइट राइडर्स (KKR) यांच्यात ईडन गार्डन्सवर सामना रंगला. या सामन्यातही रोहित शर्मा अवघ्या १३ चेंडूंत १५ धावा करून बाद झाला. २०१७ सालापासून रोहितला या मैदानावर धावा करण्यासाठी प्रचंड संघर्ष करावा लागत आहे. २०१७ ते २०२६ दरम्यान रोहितने येथे ५ आयपीएल डावांत अवघ्या २१.८० च्या सामान्य सरासरीने केवळ १०९ धावा केल्या आहेत. याउलट, २०११ ते २०१६ या सुवर्णकाळात रोहितने याच मैदानावर ८ डावांत तब्बल ७७.८० च्या सरासरीने आणि १५२ पेक्षा अधिकच्या स्ट्राईक रेटने ३८९ धावा कुटल्या होत्या. सौरभ दुबेच्या जाळ्यात अडकला ‘हिटमॅन’ – 📍 Eden Gardens (2/3) pic.twitter.com/F3qT0xJTo2 — Rohit Sharma Fan (@hitmanfanfollow) May 20, 2026 केकेआरविरुद्धच्या सामन्यात रोहित शर्मा सुरुवातीला चांगल्या लयीत दिसत होता. बाद होण्यापूर्वी त्याने कोलकाताचा गोलंदाज सौरभ दुबेच्या चेंडूवर एक शानदार षटकारही खेचला. मात्र, पुढच्याच चेंडूवर दुबेने हुशारीने चेंडूचा वेग बदलला. सौरभने टाकलेल्या फुल लेंथ चेंडूवर रोहितने पुन्हा मोठा फटका मारण्याचा प्रयत्न केला, पण चेंडू हवेत खूप उंच गेला आणि कॅमेरुन ग्रीनने कोणतीही चूक न करता एक अप्रतिम झेल टिपत रोहितची खेळी संपुष्टात आणली. हेही वाचा – Riyan Parag Slams : ‘फक्त क्रिकेटवर बोला, वैयक्तिक आयुष्यावर नाही’, कॉमेंटेटर्सच्या ‘त्या’ वर्तनावर रियान पराग भडकला फिटनेसच्या समस्येने सतावले; चाहत्यांची धाकधूक वाढली – आयपीएल २०२६ च्या या संपूर्ण हंगामात रोहित शर्मा फिटनेसच्या समस्येशी झगडताना दिसला आहे. आरसीबीविरुद्धच्या सामन्यात त्याला ‘हॅमस्ट्रिंग’ची गंभीर दुखापत झाली होती, ज्यामुळे त्याला सलग चार सामन्यांना मुकावे लागले होते. दुखापतीनंतर त्याने लखनौविरुद्ध ८४ धावांची धडाकेबाज खेळी करत दमदार पुनरागमन केले होते, परंतु त्यानंतर सलग तीन डावांमध्ये तो मोठी धावसंख्या उभारण्यात अपयशी ठरला आहे. आता मुंबई इंडियन्स आपला शेवटचा लीग सामना राजस्थान रॉयल्सविरुद्ध खेळणार असून, या सामन्यात हिटमॅन जुन्या अंदाजात परतणार का, याकडे सर्वांचे लक्ष लागले आहे.
