Rohit Pawar : अजित पवार यांच्या विमान अपघातप्रकरणी मुख्य वैमानिक सुमित कपूर यांच्या भूमिकेवर संशय व्यक्त करत आमदार रोहित पवार (Rohit Pawar) यांनी सखोल चौकशीची मागणी केली आहे. दिल्लीत घेतलेल्या पत्रकार परिषदेत त्यांनी बारामतीमधील विमान अपघाताबाबत सादरीकरण करत अनेक प्रश्न उपस्थित केले. रोहित पवार म्हणाले, अपघाताच्या काही क्षण आधी सहवैमानिक कॅप्टन शांभवी पाठक यांचा संवाद असलेली ऑडिओ क्लिप समोर आली. त्यात त्या ‘ओह शीट… ओह शीट’ असे म्हणताना ऐकू येतात. विमान खूप खाली गेल्यानंतर ते कोसळणार याचा अंदाज आल्यामुळेच त्यांची ही प्रतिक्रिया असावी, असे रोहित पवार म्हणाले. त्यांनी स्पष्ट केले की कॅप्टन शांभवी पाठक यांच्यावर कोणताही आक्षेप नाही. मात्र संशय मुख्य वैमानिक सुमित कपूर यांच्याबाबत आहे. ज्या गावाजवळ विमान कोसळले तेथून नियमितपणे विमाने जातात. मात्र ग्रामस्थांनी या विमानाचा आवाज वेगळा असल्याचे सांगितले. विमान अतिशय खाली असल्याने स्टॉल वॉर्निंग सिस्टीम सुरू व्हायला हवी होती. मात्र, ती बंद असण्याची शक्यता त्यांनी व्यक्त केली. तसेच, मूळ नियोजित वैमानिक ट्रॅफिकमध्ये अडकल्याने सुमित कपूर यांची ऐनवेळी नियुक्ती झाली, हा दावा संशयास्पद असल्याचे त्यांनी सांगितले. कपूर यांचा परवाना २०१० आणि २०१७ मध्ये दारू पिऊन विमान चालवल्याप्रकरणी रद्द करण्यात आला होता. तसेच त्यांच्या लँडिंगबाबत पूर्वीही तक्रारी होत्या. या सर्व बाबींची सखोल आणि जलद चौकशी व्हावी, अशी मागणी त्यांनी केली.
