Rohit Pawar : जामखेड नगरपरिषदेत जन्म दाखल्यासाठी लाच मागितल्याप्रकरणी झालेल्या कारवाईनंतर आता राजकीय वातावरण चांगलेच तापले आहे. या प्रकरणावरून कर्जत-जामखेडचे आमदार रोहित पवार यांनी सत्ताधारी भाजपवर अत्यंत बोचरी टीका केली असून, नगरपरिषदेचा कारभार भ्रष्टाचाराने बरबटलेला असल्याचा आरोप केला आहे. (Rohit Pawar) जामखेड नगरपरिषदेमध्ये जन्म दाखला देण्यासाठी ३ हजार रुपयांच्या लाचेची मागणी करण्यात आली होती. याप्रकरणी लाचलुचपत प्रतिबंधक विभागाने (ACB) कारवाई करत एका लिपिकासह मदतनीसाला ताब्यात घेतले. या कारवाईमुळे नगरपरिषद प्रशासनात मोठी खळबळ उडाली आहे. (Rohit Pawar) ’छोटे मासे गळाला, पण बडा शार्क मोकाट’ या कारवाईवर प्रतिक्रिया देताना रोहित पवार यांनी सोशल मीडियाद्वारे सत्ताधाऱ्यांवर निशाणा साधला. ते म्हणाले की, “लाचलुचपत प्रतिबंधक विभागाने आज जो पंचनामा केला, त्यात अडकलेले दोघे केवळ छोट्या ‘चिंगळ्या’ आहेत. नगरपरिषदेतील भ्रष्टाचाराचा खरा ‘शार्क मासा’ अजूनही नामानिराळा आहे.” हा मोठा मासा कोण? असा प्रश्न आता जामखेडकरांमध्ये चर्चिला जात आहे. (Rohit Pawar) भाजपवर गंभीर आरोप आमदार पवार यांनी केवळ प्रशासनावरच नाही, तर सत्ताधारी भाजपवरही गंभीर आरोप केले आहेत. “भ्रष्टाचाराच्या पाण्यात पोहणाऱ्या या शार्क माशाला वाचवण्याचा आणि त्याला मुदतवाढ देण्याचा प्रयत्न भाजप करत आहे. मात्र, हा प्रयत्न आम्ही यशस्वी होऊ देणार नाही आणि तो हाणून पाडला जाईल,” असा इशारा त्यांनी दिला आहे. (Rohit Pawar) जामखेडकरांच्या सुटकेसाठी आग्रही भूमिका जोपर्यंत या मुख्य सूत्रधारावर कारवाई होत नाही, तोपर्यंत बाकीचे कर्मचारी नीट काम करणार नाहीत आणि जामखेडकरांची या भ्रष्ट कारभारातून सुटका होणार नाही, असेही पवारांनी आपल्या पोस्टमध्ये म्हटले आहे. (Rohit Pawar) या प्रखर टीकेमुळे आता आगामी काळात नगरपरिषदेतील राजकारण अधिक आक्रमक होण्याची चिन्हे दिसत आहेत. आमदार रोहित पवारांच्या या ‘शार्क मासा’ विधानानंतर सत्ताधारी भाजप यावर काय प्रत्युत्तर देते, याकडे सर्वांचे लक्ष लागले आहे. (Rohit Pawar)
