राजगुरुनगर : मुसळधार पावसामुळे माळशेज घाटातील करंजाळे गावाच्या हद्दीत रस्ता खचल्याने सुरक्षेच्या कारणास्तव माळशेज घाटातील वाहतूक तात्पुरती बंद करण्यात आली आहे. दरडी कोसळण्याचा तसेच रस्ता आणखी खचण्याचा धोका लक्षात घेऊन हा निर्णय घेण्यात आला असून, वाहनचालकांनी माळशेज घाटातून प्रवास टाळून पर्यायी मार्गांचा वापर करावा, असे आवाहन महामार्ग सुरक्षा पथकाचे सहाय्यक पोलिस निरीक्षक शरद शिंपणे आणि पोलीस उपनिरीक्षक शिवाजी नर्‍हे यांनी केले आहे.

सतत सुरू असलेल्या पावसामुळे घाट परिसरातील माती सैल झाल्याने रस्त्याचा काही भाग खचला आहे. त्यामुळे पुढील आदेश मिळेपर्यंत माळशेज घाटातून सर्व प्रकारची वाहतूक बंद ठेवण्यात आली आहे. प्रशासनाकडून परिस्थितीवर सतत लक्ष ठेवण्यात येत असून, रस्त्याच्या दुरुस्तीचे काम सुरक्षिततेच्या दृष्टीने टप्प्याटप्प्याने हाती घेतले जाणार आहे. महामार्ग पोलिसांनी वाहनचालकांसाठी पर्यायी मार्गही जाहीर केले आहेत. आळेफाट्यावरून कल्याण आणि मुंबईकडे जाणार्‍या वाहनांनी आळेफाटा-संगमनेर-नाशिक-कसारा घाट या मार्गाचा वापर करावा. तसेच आळेफाटा-मंचर-चाकण-लोणावळा मुंबई-कल्याण हा मार्गही पर्यायी म्हणून खुला असल्याचे पोलिसांनी सांगितले आहे.

महामार्ग पोलिसांनी वाहनचालकांना प्रशासनाच्या सूचनांचे काटेकोर पालन करण्याचे, अनावश्यकपणे माळशेज घाटाकडे जाणे टाळण्याचे तसेच सुरक्षित पर्यायी मार्गांचा वापर करूनच प्रवास करण्याचे आवाहन केले आहे. मुसळधार पावसाच्या पार्श्वभूमीवर घाट परिसरात सतर्कता बाळगण्याचे निर्देशही देण्यात आले आहेत.