मुंबई : क्रिकेटपटू रिंकू सिंहला डी कंपनीच्या नावाने मेसेज पाठवून 5 कोटी रुपयांच्या खंडणीच्या मागणी करणारा आरोपी मोहम्मद दिलशाद मोहम्मद नौशादचा आणखी एक मोठा कारनामा समोर आला आहे. आरोपी मोहम्मद दिलशाद मोहम्मद नौशादने देशातील दोन अब्जाधीश भावांकडून 20 कोटी रुपयांची खंडणी मागितली होती. अहमदाबाद येथील अब्जाधीश बंधूंनी त्यांच्या कंपनीमार्फत सर्वाधिक किंमतीचे इलेक्टोरल बाँड खरेदी केले होते. भारतातील इलेक्टोरल बाँड खरेदी करणाऱ्या टॉप टेन खरेदीदारांच्या यादीत त्यांचा समावेश आहे. गेल्या वर्षी सर्वोच्च न्यायालयाच्या आदेशानुसार निवडणूक आयोगाला इलेक्टोरल बाँड खरेदी करणाऱ्या सर्व कंपन्यांची नावे आणि त्यांनी भरलेली रक्कम त्यांच्या वेबसाइटवर टाकावी लागली, तेव्हा मोहम्मद दिलशाद मोहम्मद नौशाद याने याच संधीचा फायदा घेत त्यांना खंडणीसाठी धमकावल्याची माहिती सूत्रांनी दिली आहे. मोहम्मद दिलशादने 18 एप्रिल 2025 रोजी रात्री 11.59 वाजता या भावांना एक ईमेल पाठवला होता. त्याच दिवशी मोहम्मद दिलशादने प्रसिद्ध वेस्ट इंडिज येथील डॉ. अलीम मोहम्मद यांना ईमेल करून पाच मिलियनची खंडणी मागितली. दिलशादने डॉक्टरांना धमकी देत लिहिले की, तुमच्या वाहनात बॉम्ब कसा ठेवायचा हे मला माहित आहे. या धमकीनंतर मोहम्मद दिलशादला वेस्ट इंडिजमध्ये अटक करण्यात आली आणि 1 ऑगस्ट रोजी त्याला मुंबईत डिपोर्ट करण्यात आले. त्यानंतर मुंबई क्राईम ब्रँचने त्याला ताब्यात घेतले. त्याच्याविरोधातील सर्व पुरावे न्यायालयात सादर केले.
