मुंबई – रिझर्व बँकेने व्यावसायिक बँकांच्या 2024- 25 वर्षाच्या कामकाजासंदर्भात जारी केलेल्या टिपणामध्ये सांगितले आहे की, बँकांची ढोबळ अनुत्पादक मालमत्ता केवळ 2.2% वर आली आहे. ही अनुत्पादक मालमत्ता अनेक दशकांच्या निचांकी पातळीवर आहे. अहवालात नमूद केले आहे की, सर्वच आघाड्यावर व्यवसाईक बँकांची परिस्थिती सुधारली आहे. बँकांचे नफे वाढत आहेत. बँकांचा कर्ज पुरवठा वाढत आहे. त्याचबरोबर बँकांच्या ठेवी समाधानकारक प्रमाणात वाढत आहेत. बँकांचा कर्जपुरवठा आणि ठेवी संकलन 10% पेक्षा जास्त आहे. यामध्ये काही प्रमाणात घट झाली असली तरी परिस्थिती समाधानकारक आहे. बँकांची भांडवल सुलभता व भांडवल उभारणी समाधानकारक असल्याचे अहवालात नमूद करण्यात आले आहे. बँकांची परिस्थिती बळकट असल्यामुळे बँका आवश्यक कर्ज पुरवठा विविध क्षेत्रांना करत असल्यामुळे विविध क्षेत्रांची परिस्थिती नफादायक राहण्यास मदत होत आहे. 2024 -25 मध्ये सर्व बँकांचा नफा 14.8 टक्क्यानी वाढून 4.01 लाख कोटी रुपये इतका झाला होता. 2023- 24 मध्ये बँकांचा नफा 32.8 टक्क्यानी वाढून 3.5 लाख कोटी रुपये झाला होता. त्यामुळे बँकांचे परिस्थिती अधिक नफादायक होत राहणार असल्याचे दिसून येते. या कालावधीत बँकांचा मालमत्तावरील परतावा 1.4% तर भांडवलावरील परतावा 13.5 टक्के इतका समाधानकारक असल्याचे सांगण्यात आले. चालू आर्थिक वर्षात पहिल्या सहा महिन्यातही बँकांची परिस्थिती बळकट असल्याची आकडेवारी समोर येत आहे. मार्च 2025 अखेरीस बँकांची ढोबळ अनुत्पादक मालमत्ता 2.2% इतकी होती. तर सप्टेंबर 2025 अखेर बँकांची ढोबळ अनुत्पादक मालमत्ता आणखी कमी होऊन 2.1 टक्के इतकी नोंदली गेली आहे. नागरी सहकारी बँकांची परिस्थिती 2024- 25 मध्ये बळकट झाली आहे. या बँकांची अनुत्पादक मालमत्ता वेगाने कमी होत असून या बँका पुरेसे भांडवल उभारीत आहेत. बिगर बँकिंग वित्तीय संस्थांच्या कामकाजाबाबत रिझर्व बँकेने समाधान व्यक्त केले आहे. या क्षेत्राचा कर्जपुरवठा 10% पेक्षा जास्त आहे. त्याचबरोबर या बँकाकडे पुरेसे भांडवल उपलब्ध आहे. शिवाय या क्षेत्राची अनुत्पादक मालमत्ता समाधानकारक पातळीवर असल्याचे रिझर्व बँकेने नमूद केले आहे. वित्तीय क्षेत्र यामुळे आगामी काळात अर्थव्यवस्थेला आवश्यक तो आधार देऊ शकेल असे स्पष्ट करण्यात आले.
