Reliance Share Price: देशातील सर्वात मोठी खासगी कंपनी असलेल्या रिलायन्स इंडस्ट्रीज लिमिटेडच्या (RIL) शेअर्समध्ये मंगळवारी मोठी पडझड पाहायला मिळाली. गेल्या सात महिन्यांतील ही सर्वात मोठी घसरण असून, कंपनीच्या बाजारमूल्यात (Market Valuation) सुमारे एक लाख कोटी रुपयांची घट झाली आहे. रशियाकडून कच्च्या तेलाचा पुरवठा थांबल्याचे कंपनीने स्पष्ट केल्यानंतर आणि अमेरिकेचे राष्ट्राध्यक्ष डोनाल्ड ट्रम्प यांच्या इशाऱ्यानंतर गुंतवणूकदारांनी समभागांची विक्री करण्यावर भर दिला. शेअरमध्ये ४.५ टक्क्यांची घसरण – मंगळवारी बाजार बंद होताना रिलायन्सचा शेअर ४.५ टक्क्यांनी घसरून १,५०७.६० रुपयांवर स्थिरावला. ४ जून २०२४ नंतरची ही सर्वात नीचांकी पातळी ठरली आहे. सत्रादरम्यान हा शेअर ५.१ टक्क्यांपर्यंत कोसळून १,४९६.३० रुपयांपर्यंत खाली आला होता. या पडझडीमुळे गुंतवणूकदारांचे प्रचंड नुकसान झाले आहे. रशियाकडून तेल पुरवठा बंद रिलायन्स इंडस्ट्रीजने दिलेल्या स्पष्टीकरणानुसार, गेल्या तीन आठवड्यांपासून कंपनीला रशियाकडून कच्च्या तेलाची एकही खेप मिळालेली नाही. जानेवारी महिन्यातही हा पुरवठा होण्याची शक्यता नसल्याचे कंपनीने म्हटले आहे. युरोपीय महासंघाने (EU) लादलेल्या निर्बंधांचे पालन करण्यासाठी रिलायन्सने आपल्या जामनगर येथील निर्यात-विशेष (SEZ) रिफायनरीमध्ये रशियन तेलाचे शुद्धीकरण करणे थांबवले आहे. ट्रम्प यांचा ‘टॅरिफ’ इशारा कारणीभूत? रशिया-भारत ऊर्जा संबंधांवरून अमेरिकेचे राष्ट्राध्यक्ष डोनाल्ड ट्रम्प यांनी भारताला इशारा दिला आहे. जर भारताने रशियाकडून तेल खरेदी करणे बंद केले नाही, तर भारतावर मोठ्या प्रमाणात ‘टॅरिफ’ (आयात शुल्क) लावले जातील, असे ट्रम्प यांनी म्हटले आहे. या विधानामुळे भू-राजकीय तणाव वाढला असून, त्याचा थेट परिणाम शेअर बाजारातील रिलायन्सच्या कामगिरीवर दिसून आला. शेअरमध्ये मोठी घसरण झाली असली, तरी अनेक बाजार तज्ज्ञ आणि ब्रोकरेज फर्म्स अद्याप रिलायन्सबाबत सकारात्मक आहेत. बहुतांश संस्थांनी या शेअरला ‘बाय’ (खरेदी) रेटिंग दिले असून, आगामी काळात हा शेअर १,६८५ रुपयांपर्यंत मजल मारेल, असा अंदाज वर्तवला आहे. अस्वीकरण: (येथे दिलेली माहिती केवळ माहितीच्या उद्देशाने आहे. हे लक्षात ठेवणे महत्त्वाचे आहे की बाजारात गुंतवणूक करणे हे बाजारातील जोखमींच्या अधीन आहे. गुंतवणूकदार म्हणून गुंतवणूक करण्यापूर्वी नेहमीच तज्ञांचा सल्ला घ्या. dainikprabhat.com कधीही येथे गुंतवणूक करण्याची शिफारस करत नाही.)
