Wai: दिवाळीच्या पार्श्वभूमीवर वाई तालुक्यात फटाका विक्रीच्या परवाना प्रक्रियेवरून प्रशासनाच्या कार्यपद्धतीबाबत प्रश्न उपस्थित होत आहेत. शहरातील फटाका विक्रेत्यांना अग्निसुरक्षेसह विविध अटींची पूर्तता करण्याची सक्ती केली जात असताना, ग्रामीण भागात परवानगीपूर्वीच फटाका विक्री सुरू असल्याच्या तक्रारी पुढे येत आहेत. त्यामुळे शहरातील विक्रेत्यांसाठी एक नियम आणि ग्रामीण भागातील विक्रेत्यांसाठी वेगळा नियम आहे का? असा सवाल नागरिकांकडून उपस्थित केला जात आहे.

फटाका विक्रीसाठी आवश्यक परवाने, अग्निसुरक्षा व्यवस्था आणि इतर अटींची पूर्तता करणे बंधनकारक आहे. मात्र, परवाना मिळण्यापूर्वीच विक्री सुरू असल्याच्या तक्रारी खर्‍या असतील, तर संबंधित विक्रेत्यांची तपासणी करून कारवाई का केली जात नाही, असा प्रश्न यानिमित्ताने उपस्थित झाला आहे.

किराणा दुकानांतूनही फटाका विक्री; परवान्यांचे काय?

ग्रामीण भागातील अनेक किराणा दुकानदार दिवाळीच्या दिवसात फटाके विक्री करत असल्याची चर्चा आहे. संबंधित दुकानांची नोंदणी आणि परवान्यांची पडताळणी केली जाते का? किराणा दुकानांमध्ये फटाक्यांचा साठा ठेवताना अग्निसुरक्षा नियमांचे पालन होते का? तालुक्यातील ग्रामीण भागात गावोगावी सुरू असलेल्या विक्री केंद्रांची अधिकृत नोंद, परवान्यांची वैधता आणि साठवणुकीची व्यवस्था यांची तपासणी करण्याची गरज आहे.

वाई नगरपालिकेच्या अग्निशमन विभागाकडे उपलब्ध वाहने, कर्मचारी आणि उपकरणे यांची स्थिती काय आहे? दुर्गम गावांमध्ये एखादी दुर्घटना घडल्यास अग्निशमन दल किती तत्परतेने पोहोचू शकते? परवाना देण्यापूर्वी प्रत्यक्ष स्थळपाहणी, दुकानांमधील सुरक्षित अंतर, आपत्कालीन मार्ग आणि अग्निशामक उपकरणांची उपलब्धता तपासली जाते का? या प्रश्नांची उत्तरे प्रशासनाने द्यावीत अशी मागणी होत आहे. एकूणच परवानाधारक आणि विनापरवाना विक्री करणार्‍यांची पडताळणी, गोडाऊनची तपासणी, विमा कागदपत्रांची वैधता आणि अग्निसुरक्षा नियमांचे पालन यांचा सविस्तर आढावा घेण्याची गरज आहे.

नियम सर्वांसाठी समान असतील, तर त्यांची अंमलबजावणीही समान झाली पाहिजे. शहरातील विक्रेत्यांप्रमाणेच ग्रामीण भागातील किराणा दुकाने, तात्पुरती विक्री केंद्रे आणि फटाक्यांची गोडाऊन यांचीही तपासणी होणार का? परवानगीपूर्वी विक्री सुरू असल्याच्या तक्रारींची दखल घेऊन प्रशासन प्रत्यक्ष कारवाई करणार की दुर्घटना घडल्यानंतरच जागे होणार? या प्रश्नांची उत्तरे आता वाई तालुक्यातील नागरिकांना अपेक्षित आहेत.