भवानीनगर : भवानीनगर (ता. इंदापूर) येथील श्री छत्रपती सहकारी साखर कारखान्याकडे माळशिरस तालुक्यातील कोळेगाव येथून ट्रॅक्टरच्या साहाय्याने तब्बल १०० किलोमीटर अंतरावरून दोन ट्रेलर उसाची एक खेप गाळपासाठी आणण्यात आली. या एकाच खेपेमध्ये तब्बल ४५. ७०८ टन विक्रमी वजन भरल्याने, ऊस वाहतूक करणारा ट्रॅक्टरचालक अजय बाळासाहेब सावंत यांचा कारखान्याचे कार्यकारी संचालक अशोक जाधव यांच्या हस्ते सत्कार करण्यात आला. आतापर्यंतच्या ऊस वाहतुकीच्या बाबतीत ट्रॅक्टरच्या एकाच खेपेमध्ये एवढा मोठ्या प्रमाणावर ऊस आणल्याने या चालकाने नवा विक्रम प्रस्थापित केला आहे.

शुक्रवारी (दि. ३०) कोळेगाव येथील शेतकरी उमेश नामदेव मगर यांनी आपल्या शेतात ८६०३२ या जातीच्या आडसाली उसाची लागवड केली होती. योग्य व उत्तम जोपासना केल्यामुळे हा ऊस अत्यंत दर्जेदार तयार झाला होता. या शेतातील ऊस ट्रॅक्टरचालक अजय सावंत यांनी दोन ट्रेलरमध्ये भरून कारखान्याकडे गाळपासाठी आणला. कारखान्याच्या वजन काट्यावर मोजमाप केले असता, ट्रॅक्टर व ट्रेलरचे वजन (५५. १०) वजा जाता प्रत्यक्ष निव्वळ उसाचे वजन तब्बल ४५. ७०८ मेट्रिक टन भरले.

सुमारे १०० किलोमीटरच्या लांब पल्ल्यावरून आणि एवढ्या मोठ्या वजनाची उसाची वाहतूक यशस्वीपणे केल्याबद्दल कारखान्याचे अध्यक्ष पृथ्वीराज जाचक, उपाध्यक्ष शिवाजी निंबाळकर, सर्व संचालक मंडळ, कार्यकारी संचालक अशोक जाधव तसेच उपस्थित अधिकारी व सभासदांच्या हस्ते चालक अजय सावंत यांचा श्रीफळ देऊन सत्कार करण्यात आला. कष्टाला योग्य नियोजनाची जोड दिल्यास कसे यश मिळते, याचेच हे उत्तम उदाहरण ठरले असून, या कामगिरीबद्दल संपूर्ण कारखाना कार्यक्षेत्रातून चालक अजय सावंत यांचे कौतुक होत आहे.

उत्कृष्ट जोपासना आणि विक्रमी वजन

श्री छत्रपती सहकारी साखर कारखान्याचा २०२६-२७ चा गळीत हंगाम सध्या सुरू असून, कारखान्याने यापूर्वी एकाच दिवसात ९ हजार मेट्रिक टन ऊस गाळप आणि १४ दिवसांत १ लाख मेट्रिक टन ऊसाचा टप्पा पार करत विविध विक्रम केले आहेत. यात आता ऊसतोड व वाहतूकदारानेही विक्रमी भर घातली आहे.