नेवासे : शब्दगंध साहित्यिक परिषदेच्या वतीने दिला जाणारा यंदाचा मानाचा “राज्यस्तरीय शब्दगंध शैक्षणिक कार्य गौरव पुरस्कार २०२६”भानसहिवरे (ता.नेवासे) येथील सुलोचना बेल्हेकर शिक्षण संस्थेच्या संचलिका डॉ. रंजना सुरेश बेल्हेकर यांना जाहीर झाला आहे. त्यांच्या शैक्षणिक आणि सामाजिक क्षेत्रातील उल्लेखनीय कार्याची दखल घेऊन हा पुरस्कार प्रदान करण्यात येणार आहे. शब्दगंध साहित्यिक परिषदेच्यावतीने १७ वे राज्यस्तरीय शब्दगंध साहित्य संमेलन दि.२३ आणि २४ मे २०२६ रोजी जाधव लॉन्स, नगर-कल्याण रोड, अहिल्यानगर येथे आयोजित करण्यात आलेले आहे. या दोन दिवशीय संमेलनाचा समारोप रविवारी होणार आहे. २४ मे २०२६ रोजी दुपारी ४.०० वाजता संमेलनाच्या समारोप समारंभामध्ये डॉ. रंजना बेल्हेकर यांना हा गौरव पुरस्कार पालक मंत्री राधाकृष्ण विखे पाटील, कृषीमंत्री दत्तात्रय भरणे, आमदार संग्राम जगताप यांच्या हस्ते प्रदान करण्यात येणार आहे. या सोहळ्याला आपण मित्रपरिवारासह बहुसंख्येने उपस्थित राहावे, असे आवाहन शब्दगंध साहित्यिक परिषदेचे अध्यक्ष राजेंद्र उदागे, कार्याध्यक्ष ज्ञानदेव पांडुळे, सचिव सुनील गोसावी, नेवासा तालुका शाखा अध्यक्ष प्रा. डॉ. किशोर धनवटे आणि मार्गदर्शक प्रा. डॉ. अशोकराव ढगे यांनी केले आहे. हा पुरस्कार डॉ. रंजना बेल्हेकर जाहीर झाल्याबद्दल त्यांच्यावर सर्वस्तरातून अभिनंदनाचा वर्षाव होत आहे. हेही वाचा : Gunaratna Sadavarte : ‘ …तर मुख्यमंत्री लाडकी बहीण योजना बंद करा’ ; अॅड. गुणरत्न सदावर्ते यांची मोठी मागणी
