Stock Market : सलग दोन दिवसांच्या तेजीनंतर बुधवारी भारतीय शेअर बाजारात मोठी घसरण झाली. भारतीय रिझर्व्ह बँकेने (RBI) जवळपास चार वर्षांनंतर प्रथमच रेपो दरात वाढ केल्याने आणि कच्च्या तेलाच्या वाढत्या किमतीमुळे गुंतवणूकदारांच्या भावनेवर परिणाम झाला.

सेन्सेक्स 429.11 अंकांनी म्हणजेच 0.59 टक्क्यांनी घसरून 72,638.70 अंकांवर बंद झाला. दिवसभरात तो 599.09 अंकांनी घसरून 72,468.72 अंकांपर्यंत खाली आला. सेन्सेक्समधील 30 पैकी 26 कंपन्यांचे शेअर्स घसरले, तर चार कंपन्यांचे शेअर्स वाढले.

निफ्टीही 173.05 अंकांनी घसरून 22,603.05 अंकांवर बंद झाला. वाढत्या कच्च्या तेलाच्या किमती आणि परदेशी गुंतवणूकदारांकडून सुरू असलेली विक्री यामुळे बाजारावर दबाव राहिला. मंगळवारी विदेशी संस्थात्मक गुंतवणूकदारांनी (FIIs) 2,961.30 कोटी रुपयांचे शेअर्स विकल्याची माहिती शेअर बाजाराच्या आकडेवारीतून समोर आली आहे.

रेपो दरात 0.25 टक्क्यांची वाढ –

दरम्यान, RBI च्या सहा सदस्यीय चलनविषयक धोरण समितीने (MPC) रेपो दरात 0.25 टक्क्यांची वाढ करून तो 5.50 टक्के केला. गव्हर्नर संजय मल्होत्रा यांनी पदभार स्वीकारल्यानंतरची ही पहिली रेपो दरवाढ आहे. वाढती महागाई आणि रुपयाच्या कमकुवत स्थितीच्या पार्श्वभूमीवर RBI ने हा निर्णय घेतला.

या निर्णयासोबत RBI ने आपल्या धोरणात्मक भूमिकेतही महत्त्वाचा बदल केला. ‘न्यूट्रल’ भूमिकेऐवजी ‘कॅलिब्रेटेड टाइटनिंग’ म्हणजेच गरजेनुसार धोरण आणखी कडक करण्याची भूमिका स्वीकारण्यात आली. त्यामुळे नजीकच्या काळात रेपो दर कपातीची शक्यता कमी झाली आहे. परिस्थितीनुसार पुढील निर्णय दरवाढ किंवा दर कायम ठेवण्याच्या स्वरूपात होऊ शकतो, असे RBI गव्हर्नरांनी स्पष्ट केले.

प्रमुख घसरणारे शेअर्स –

सेन्सेक्समधील टायटन, भारत इलेक्ट्रॉनिक्स, एशियन पेंट्स, इन्फोसिस, लार्सन अँड टुब्रो आणि अदानी पोर्ट्स हे प्रमुख घसरणारे शेअर्स ठरले. दुसरीकडे कोटक महिंद्रा बँक, भारती एअरटेल, ICICI बँक आणि बजाज फायनान्स यांच्या शेअर्समध्ये वाढ झाली.

जागतिक बाजारातही संमिश्र वातावरण होते. दक्षिण कोरियाचा कोस्पी, जपानचा निक्केई 225 आणि हँगसेंग निर्देशांक घसरणीसह बंद झाले. युरोपियन बाजारातही घसरणीचे वातावरण होते. मंगळवारी अमेरिकेतील बाजार मात्र वाढीसह बंद झाले होते.

दरम्यान, ब्रेंट क्रूडच्या किमतीत 1.41 टक्क्यांची वाढ होऊन दर 102 डॉलर प्रति बॅरलवर पोहोचला. कच्च्या तेलाच्या किमतीतील वाढ भारतीय अर्थव्यवस्थेसाठी महत्त्वाची ठरते, कारण भारत मोठ्या प्रमाणावर कच्च्या तेलाची आयात करतो.

मंगळवारी सेन्सेक्स 685.34 अंकांनी म्हणजेच 0.95 टक्क्यांनी वाढून 73,067.81 अंकांवर, तर निफ्टी 220.35 अंकांनी म्हणजेच 0.98 टक्क्यांनी वाढून 22,776.10 अंकांवर बंद झाला होता. मात्र, बुधवारी RBI च्या धोरणातील बदल आणि वाढत्या तेलाच्या किमतींच्या पार्श्वभूमीवर या तेजीला ब्रेक लागला.

आज गुंतवणूकदारांचे 3.76 लाख कोटी रुपये बुडाले –

एक व्यावसायिक दिवस आधी म्हणजेच 6 ऑक्टोबर रोजी बीएसईवर लिस्टेड असलेल्या सर्व शेअर्सचे एकूण मार्केट कॅप ₹4,74,75,096.17 कोटी होते. आज म्हणजेच 7 ऑक्टोबर रोजी ते घसरून ₹4,70,98,930.68 कोटी झाले. याचा अर्थ गुंतवणूकदारांच्या भांडवलात आज ₹376,165.49 कोटींची घट झाली आहे.

RBI च्या रेपो दरवाढीचा शेअर बाजाराला झटका का बसतो?

RBI रेपो दर वाढवते तेव्हा बँकांसाठी कर्ज घेणे महाग होते. त्यामुळे गृहकर्ज, वाहनकर्ज आणि उद्योगांचे कर्ज महाग होण्याची शक्यता असते. कंपन्यांचा खर्च वाढून नफा कमी होऊ शकतो. भविष्यातील वाढीवरही परिणाम होण्याची भीती निर्माण होते. त्यामुळे गुंतवणूकदार शेअर्सची विक्री करतात आणि बाजारात घसरण होते.