RB Choudary death: दाक्षिणात्य चित्रपटसृष्टीतील ज्येष्ठ आणि प्रतिथयश निर्माते आर.बी. चौधरी (वय ७६) यांचे राजस्थानमध्ये भीषण रस्ते अपघातात निधन झाले. त्यांच्या निधनामुळे तमिळ, तेलगू आणि मल्याळम चित्रपटसृष्टीवर शोककळा पसरली आहे. तामिळगा वेत्री कळघम (TVK) पक्षाचे अध्यक्ष आणि सुपरस्टार थलपती विजय याने बुधवारी चौधरी यांच्या निवासस्थानी जाऊन त्यांचे अंतिम दर्शन घेतले आणि कुटुंबाचे सांत्वन केले. मिळालेल्या माहितीनुसार, आर.बी. चौधरी हे आपल्या पुतण्यासह राजस्थानमधील लिलांबा गावात एका नातेवाईकाच्या लग्नासाठी गेले होते. मंगळवारी लग्नकार्यावरून परतत असताना बेवर जिल्ह्यातील जूठा गावाजवळ त्यांच्या कारसमोर अचानक गुरे आली. त्यांना वाचवण्याच्या प्रयत्नात कारवरील नियंत्रण सुटले आणि वाहन रस्त्याच्या कडेला असलेल्या भिंतीवर जोरात आदळले. हा अपघात इतका भीषण होता की आर.बी. चौधरी यांचा जागीच मृत्यू झाला. चित्रपटसृष्टीत शोककळा – आर.बी. चौधरी यांचे पार्थिव चेन्नईतील त्यांच्या निवासस्थानी आणल्यानंतर संपूर्ण चित्रपटसृष्टी एकवटली होती. कडेकोट बंदोबस्तात थलपती विजयने चौधरी यांच्या घरी धाव घेतली. विजयच्या सुरुवातीच्या काळातील अनेक यशस्वी चित्रपटांची निर्मिती ‘सुपर गुड फिल्म्स’ने केली होती, त्यामुळे तो भावूक झालेला पाहायला मिळाला. मल्याळम सुपरस्टार ममूटी, धनुष, सूर्या शिवकुमार, चियान विक्रम आणि सिद्धार्थ यांसारख्या आघाडीच्या अभिनेत्यांनी निवासस्थानी जाऊन आदरांजली वाहिली. विजयचे वडील आणि ज्येष्ठ दिग्दर्शक एस.ए. चंद्रशेखर यांनीही सकाळीच पोहोचून आपल्या जुन्या सहकाऱ्याला अखेरचा निरोप दिला. ‘सुपर गुड फिल्म्स’चा वारसा – आर.बी. चौधरी यांनी ‘सुपर गुड फिल्म्स’ या बॅनरखाली तमिळ, तेलगू, मल्याळम आणि हिंदी अशा विविध भाषांमध्ये अनेक सुपरहिट चित्रपटांची निर्मिती केली आहे. नवोदित कलाकारांना संधी देण्यासाठी ते ओळखले जात. त्यांचे पुत्र जीवा आणि जिथन रमेश हेदेखील दाक्षिणात्य चित्रपटसृष्टीतील प्रसिद्ध अभिनेते आहेत. त्यांच्या निधनाने सिनेसृष्टीने एक मार्गदर्शक आणि यशस्वी निर्माता गमावला असल्याची भावना व्यक्त होत आहे.
