जयपूर – राजस्थानचे मुख्यमंत्री अशोक गेहलोत यांनी शुक्रवारी विधानसभेत आगामी आर्थिक वर्षाचा अर्थसंकल्प सादर केला. 2023 च्या या अर्थसंकल्पात सीएम गेहलोत यांनी अनेक महत्त्वाच्या घोषणा केल्या आहेत. या वर्षाच्या अखेरीस राज्यात विधानसभा निवडणुकाही होणार आहेत, त्यादृष्टीने स्वयंपाकाचा गॅस स्वस्त करण्याची, तरुणांना प्राधान्य देण्याची, राज्यातील जनतेसाठी 25 लाखांपर्यंतचा आरोग्य विमा, तसेच राजस्थानमध्ये तीन नवीन वैद्यकीय महाविद्यालये उघडण्याबाबत घोषणाही अर्थसंकल्पात करण्यात आली.

राजस्थानच्या 2023 च्या अर्थसंकल्पात मुख्यमंत्री अशोक गेहलोत यांनी तरुण आणि गरीब कुटुंबांसाठी अनेक घोषणा केल्या. विशेषत: विधानसभा निवडणुकीच्या पार्श्वभूमीवर त्यांनी 500 रुपयांना स्वयंपाकाचा गॅस देण्याची केलेली घोषणा ही निवडणुकीचे संकेत असल्याचे सांगितले जात आहे. राज्यातील 76 लाख गरीब कुटुंबांना स्वस्त स्वयंपाकाच्या गॅसचा लाभ मिळणार आहे. राजस्थान विधानसभेत सादर करण्यात आलेल्या अर्थसंकल्पीय भाषणातील प्रमुख मुद्दे पुढीलप्रमाणे आहेत.

1) राजस्थानच्या तरुणांना मोठी भेट देताना सीएम गेहलोत यांनी 500 कोटी रुपयांचा युवा निधी तयार करण्याची घोषणा केली आहे. याशिवाय संशोधन करणाऱ्या विद्यार्थ्यांना सरकार 30 हजार रुपयांची मदतही देणार आहे. त्याचबरोबर पेपरफुटीवर विशेष टास्क फोर्स स्थापन करण्याची घोषणाही सरकारने केली आहे.

2) राजस्थानमधील 76 लाख गरीब कुटुंबांना आता फक्त 500 रुपयांमध्ये एलपीजी सिलिंडर मिळणार आहे. मुख्यमंत्र्यांनी शुक्रवारी अर्थसंकल्पीय भाषणात ही घोषणा केली. केंद्रातील नरेंद्र मोदी सरकारने महिलांना दिलासा देण्यासाठी उज्ज्वला योजनेंतर्गत स्वस्तात गॅस देण्याची योजना सुरू केली होती.

3) राज्यातील तरुणांना आणि विशेषतः बेरोजगारांना डोळ्यासमोर ठेवून सीएम गेहलोत यांनी अर्थसंकल्पात नोकरभरती परीक्षांबाबतही मोठी घोषणा केली आहे. ते म्हणाले की, आता राज्यात सर्व नोकरभरती परीक्षा मोफत घेतल्या जातील.

4) राजस्थानच्या यंदाच्या अर्थसंकल्पात मुख्यमंत्र्यांनी सरकारी शाळांतील मुलांना भेटवस्तूही दिल्या आहेत. अर्थसंकल्पीय भाषणात ते म्हणाले की, येत्या अधिवेशनात राज्यातील सरकारी शाळांमधील विद्यार्थ्यांना दोन जोडी गणवेश देण्यात येणार आहेत.

5) राजस्थान रोडवेजमध्येही बसेसचा ताफा वाढवण्यात येणार आहे. सरकारने 2023 च्या अर्थसंकल्पात याची व्यवस्था केली आहे. सीएम गेहलोत यांनी घोषणा केली की रोडवेजमध्ये 1000 नवीन बसेसचा समावेश केला जाईल.

6) राज्यातील वैद्यकीय शिक्षणाच्या प्रसाराकडेही काँग्रेस सरकारचे लक्ष आहे. मुख्यमंत्र्यांनी अर्थसंकल्पीय भाषणात प्रतापगड, जालोर आणि राजसमंद येथे तीन नवीन वैद्यकीय महाविद्यालये सुरू करण्याची घोषणा केली.

7) राजस्थानच्या अर्थसंकल्पीय भाषणादरम्यान सीएम गेहलोत यांनी चिरंजीव आरोग्य विमा योजनेबाबतही मोठी घोषणा केली. ते म्हणाले की, या योजनेंतर्गत आता प्रत्येक कुटुंबाला 25 लाख रुपयांपर्यंतच्या विम्याचा लाभ दिला जाणार आहे.

8) यावर्षी राजस्थानमध्ये 2000 मिनी अंगणवाडी केंद्रेही उघडली जाणार आहेत. याशिवाय राज्यातील मुलांना आता मध्यान्ह भोजन योजनेंतर्गत दररोज दूध दिले जाणार आहे.

9) राजस्थान रोडवेजच्या बसमध्ये दिल्लीच्या धर्तीवर महिलांना सवलत दिली जाणार आहे. सीएम गेहलोत यांनी अर्थसंकल्पीय भाषणात महिलांना राजस्थान रोडवेजच्या बसमध्ये 50 टक्के सवलत देण्याची घोषणा केली. आत्तापर्यंत राज्यात ही सूट 30 टक्के होती.

मुख्यमंत्री अशोक गेहलोत यांनीही कोरोनाच्या काळात अनाथ मुलांसाठी अर्थसंकल्पीय भाषणात घोषणा केली. कोविड-19 मुळे अनाथ झालेल्या मुलांना सरकारी नोकऱ्या दिल्या जातील, अशी घोषणा त्यांनी केली.