इंदूर येथील व्यापारी राजा रघुवंशी हत्या प्रकरण सध्या राज्यात मोठ्या प्रमाणात चर्चेत आहे. या प्रकरणाने आता एक नवे वळण घेतले आहे. या प्रकरणात आता ‘मानव बळी’ आणि ‘एकादशी’चा नवा अँगल समोर आला आहे. राजाच्या कुटुंबीयांनी या प्रकरणात काळा जादू, तांत्रिक क्रिया आणि मानव बळी यांसारखे गंभीर आरोप केले आहेत. या सगळ्या कटामध्ये राजाची पत्नी सोनम रघुवंशी आणि तिचा प्रियकर राज कुशवाह यांचा समावेश आहे असे राजाच्या कुटुंबियांकडून सांगण्यात आले आहे.

काही दिवसांपूर्वी सोनम आणि तिच्या सासू यांच्यातील संभाषणाचा एक ऑडिओ समोर आला होता. या ऑडिओमध्ये सोनम तिच्या ग्यारस (एकादशी) व्रताचा उल्लेख करत होती.सोनमने त्यांच्यावर आणि संपूर्ण कुटुंबावर वशीकरण केले होते. “लोक आधीच सांगत होते की तिने काहीतरी केले आहे, पण आम्ही लक्ष दिले नाही. आता स्वतः सत्य पाहत आहोत,” असे त्या म्हणाल्या. त्यांनी सांगितले की, राजा आणि सोनमने गुवाहाटी येथील कामाख्या मंदिरात दर्शन घेतले होते, जे तांत्रिक साधनेसाठी प्रसिद्ध आहे.

यानंतर सोनमने राजाला एक माळ (गळ्यातील हार) घातली होती, जी काळ्या जादूशी संबंधित असल्याचे सांगितले जाते. राजा यांच्या आईने पुढे सांगितले की, राजाची हत्या ‘एकादशी’च्या दिवशी झाली, जी हिंदू दिनदर्शिकेतील विशेष तिथी आहे आणि ती तांत्रिक क्रियांशी जोडली जाते. “मला वाटते की तिची योजना नर बळी देण्याची होती. तसेच राजा आणि सोनम दोघांच्या कुंडलीत मांगलिक दोष होता. त्यांनी यासाठी आवश्यक पूजा केली नव्हती. “आता वाटते की सुहागरातीच्या आदल्या रात्री सोनमने या दोषाचा बहाणा करून राजाला फसवले आणि त्याच्या हत्येचा कट रचला.” असे राजाच्या आईने सांगितले आहे.

नेमके काय आहे सोनम – राजा रघुवंशी प्रकरण ?
राजा आणि सोनम यांनी 11 मे रोजी विवाह केला होता आणि 20 मे रोजी हनीमूनसाठी गुवाहाटी व मेघालयला गेले होते. पण 23 मे रोजी दोघे मेघालयच्या सोहरा भागातून बेपत्ता झाले. 2 जून रोजी राजाची मृतदेह एका खोल दरीत सापडला. सोनम आधी बेपत्ता असल्याचे सांगितले जात होते, पण 9 जून रोजी ती उत्तर प्रदेशच्या गाझीपूर येथे पोलिसांच्या हाती लागली.

मेघालय पोलिसांच्या विशेष तपास पथकाने (SIT) सांगितले की, सोनम आणि तिच्या प्रियकराने तीन भाडोत्री खुनींसह मिळून आधीच राजाच्या हत्येची योजना आखली होती. पोलिसांनी असेही सांगितले की, सोनमने राजाला सांगितले होते की लग्नापूर्वी कामाख्या मंदिरात पूजा करणे आवश्यक आहे, हा त्याला तिथे नेण्याचा बहाणा होता. मंदिरात गर्दी असल्याने योजना काही दिवसांनी राबवण्यात आली.

पोलिसांच्या मते, राजाची हत्या Weisawdong फॉल्सजवळ झाली आणि त्याचा मृतदेह दरीत फेकण्यात आला. हत्येच्या वेळी सोनम घटनास्थळी उपस्थित होती. यानंतर ती शिलॉंग आणि गुवाहाटीला गेली. अनेक गाड्यांमधून प्रवास करत लपत राहिली.