Raza Murad : ८० च्या दशकात बॉलिवूडमध्ये खलनायकांच्या भूमिकांना विशेष महत्त्व होतं. अमरीश पुरी, डॅनी डेन्झोंगपा, अनुपम खेर, शक्ती कपूर, गुलशन ग्रोव्हर, कादर खान, प्रेम चोप्रा आणि अमजद खान यांसारख्या कलाकारांनी आपल्या दमदार अभिनयाने प्रेक्षकांच्या मनावर छाप पाडली. यापैकी अनेक कलाकारांनी खलनायकाच्या भूमिकांबरोबरच वेगवेगळ्या प्रकारच्या भूमिका साकारत आपल्या अभिनयाची ताकद दाखवून दिली. याच काळात आपल्या भारदस्त आवाजामुळे आणि प्रभावी व्यक्तिमत्त्वामुळे वेगळी ओळख निर्माण करणारे अभिनेते म्हणजे रझा मुराद.

राज कपूर यांनी दिली कारकिर्दीला नवी दिशा

रझा मुराद यांच्या अभिनयातील सर्वात मोठी जमेची बाजू म्हणजे त्यांचा भारदस्त आवाज. त्यांच्या आवाजातील दरारा आणि संवादफेकीच्या शैलीमुळे त्यांनी साकारलेल्या खलनायकाच्या भूमिका विशेष गाजल्या. प्रसिद्ध दिग्दर्शक आणि अभिनेते राज कपूर यांनी १९८२ मध्ये प्रदर्शित झालेल्या ‘प्रेम रोग’ या चित्रपटात त्यांना महत्त्वाची भूमिका दिली. या चित्रपटात त्यांनी ठाकूर वीरेंद्र प्रताप सिंह यांची भूमिका साकारली. या चित्रपटाने रझा मुराद यांच्या कारकिर्दीला नवी दिशा मिळाली. त्यांच्या अभिनयाची दखल घेतली गेली आणि त्यानंतर हिंदी चित्रपटसृष्टीत त्यांनी आपली वेगळी ओळख निर्माण केली.

‘राम तेरी गंगा मैली’सह अनेक चित्रपटांत गाजवला अभिनय

प्रेम रोगनंतर रझा मुराद यांनी राज कपूर यांच्या आर. के. फिल्म्सच्या बॅनरखाली तयार झालेल्या राम तेरी गंगा मैली या चित्रपटातही काम केलं. त्यानंतर ‘हेन्ना’ हा आरके बॅनरखालील तिसरा चित्रपट होता, ज्यात शाहबाज खान नावाच्या एका कारस्थानी पाकिस्तानी पोलीस अधिकाऱ्याच्या भूमिकेत रजा मुराद झळकले होते. त्यानंतर त्रिदेव, मोहरा, आँखे, जोधा अकबर यांसारख्या चित्रपटांमधून त्यांनी आपल्या अभिनयाची छाप पाडली.

नकारात्मक भूमिका साकारताना केवळ चेहऱ्यावरील हावभावच नव्हे, तर आवाजातील चढ-उतार आणि संवादफेकीतूनही व्यक्तिरेखेला प्रभावी बनवण्याची त्यांची शैली प्रेक्षकांच्या लक्षात राहिली. त्यामुळे बॉलिवूडमधील लक्षवेधी खलनायकांच्या यादीत रझा मुराद यांचं नाव आजही आवर्जून घेतलं जातं.

सोशल मीडियावर शेअर केली जुन्या आठवणींना उजाळा देणारी पोस्ट

रझा मुराद यांनी आपल्या चित्रपट कारकिर्दीतील आठवणींना उजाळा देणारी एक पोस्ट सोशल मीडियावर शेअर केली आहे. या पोस्टमध्ये त्यांनी प्रेम रोग, राम तेरी गंगा मैली आणि हेन्ना या चित्रपटांचा उल्लेख केला आहे. रजा मुराद म्हणतात “खलनायक म्हणून माझा पहिला चित्रपट. राज कपूर यांनी त्यांच्या १९८२ सालच्या ‘प्रेम रोग’ या उत्कृष्ट चित्रपटात मला सुमेरगडचे ठाकूर वीरेंद्र प्रताप सिंह म्हणून एका नवीन रूपात सादर केले. त्यानंतर त्यांनी मला ‘राम तेरी गंगा मैली’ (१९८५) मध्ये संधी दिली आणि इतिहास घडला. त्यानंतर मी कधीच मागे वळून पाहिले नाही.”

आजही चाहत्यांच्या संपर्कात

रझा मुराद सध्या चित्रपटांमध्ये पूर्वीइतके सक्रिय दिसत नसले, तरी सोशल मीडियाच्या माध्यमातून ते चाहत्यांच्या संपर्कात असतात. आपल्या जुन्या आठवणी, अनुभव आणि स्पष्ट मतं ते सोशल मीडियावरून व्यक्त करत असतात.

Gyanesh Kumar: “ज्ञानेश कुमार राजीनामा देतील असं वाटतं नाही”; काँग्रेसचे नेत्याचा दावा, कारणही सांगितले…