पुणे – औरंगाबाद व पुणे विभागांत अतिवृष्टी व पूरपरिस्थितीमुळे झालेल्या नुकसानग्रस्त भागास प्रत्यक्ष भेट देवून पाहणी केली आहे. या विभागात सोयाबीन, उडीद, तूर, कापूस, बाजरी या पिकांचे आणि पालेभाज्या, फळे यांचे नुकसान झाले आहे.

याचबरोबर रस्ते, वीज, घरे, यासारख्या पायाभूत सुविधांवर परिणाम झालेला निदर्शनास आला आहे. झालेल्या नुकसानीपोटी केंद्राकडून अधिकाधिक मदत मिळण्यासाठी प्रस्ताव सादर केला जाईल, अशी ग्वाही केंद्रीय पथक प्रमुख रमेश कुमार यांनी दिली.

पुणे विभागात जून ते ऑक्‍टोबर 2020 या कालावधीत अतिवृष्टी व पूरपरिस्थितीमुळे झालेल्या नुकसानीबाबतचा केंद्रीय पथकाने बुधवारी विभागीय आयुक्‍त कार्यालयात आढावा घेतला.

यावेळी केंद्रीय पथकाचे प्रमुख रमेश कुमार, ग्राम विकास विभागाचे उप सचिव यशपाल, केंद्रीय वित्त विभागाचे सल्लागार आर. बी. कौल, कृषी मंत्रालयाचे संचालक आर.पी. सिंग, रस्ते वाहतूक व महामार्ग विभागाचे मुख्य अभियंता तुषार व्यास, अधीक्षक अभियंता एम. एस. सहारे, उपसचिव सुभाष उमराणीकर, अतिरिक्‍त आयुक्‍त डॉ. अनिल रामोड, पुण्याचे जिल्हाधिकारी डॉ. राजेश देशमुख आदींसह वरिष्ठ अधिकारी उपस्थित होते.

केंद्र सरकारच्या विविध लोककल्याणकारी योजना नागरिकांपर्यंत पोहोचविण्याबरोबरच त्या योजनांचा वापर नागरिकांनी कशाप्रकारे केला पाहिजे याबाबत ग्रामसभा आयोजित करून माहिती द्यावी, अशा सूचनाही केंद्रीय पथक प्रमुख कुमार यांनी अधिकाऱ्यांना दिल्या. आपत्तीमुळे झालेल्या नुकसानीचा पंचनामा करणे. आंतर जिल्हा समन्वय ठेवून नुकसानाची अहवाल तयार करणे याबाबत जिल्हास्तरीय कार्यशाळा आयोजित करण्यात यावी, असेही त्यांनी सूचविले.