Raigad DPDC: सरकारकडून काही दिवसांपूर्वी पालकमंत्र्यांची यादी जाहीर करण्यात आली होती. मात्र, नाशिकमधून गिरीश महाजन आणि रायगडमधून अदिती तटकरे यांची नियुक्ती काही तासातच रद्द करण्यात आली. आता पुन्हा एकदा पालकमंत्रीपदावरून राष्ट्रवादी आणि शिंदे गटात रस्सीखेच दिसून येत आहे.

नुकतीच रायगड येथील जिल्हा नियोजन समितीची बैठक पार पडली. उपमुख्यमंत्री अजित पवार यांनी बोलवलेल्या या बैठकीला राष्ट्रवादी काँग्रेसचे नेते व प्रशासकीय अधिकारी उपस्थित होते. मात्र, या बैठकीला शिंदे गटाच्या आमदारांनी दांडी मारल्याचे पाहायला मिळाले. शिंदे गटाचे आमदार बैठकीला उपस्थित न राहिल्याने पुन्हा एकदा नाराजी नाट्याची चर्चा रंगली आहे.

ऑनलाइन पद्धतीने पार पडलेल्या या बैठकीला मंत्री आदिती तटकरे, जिल्हाधिकारी आणि इतर प्रशासकीय अधिकारी उपस्थित होते. मात्र, शिंदे गटाचा एकही नेता उपस्थित नव्हता. याबाबत विचारले असता शिवसेना आमदार महेंद्र दळवी यांनी या बैठकीसाठी आम्हाला कोणतेही निमंत्रण देण्यात आले नव्हते. आम्हाला या बैठकीबद्दल काही माहिती नव्हती, असे सांगितले. तसेच, कर्जतचे आमदार महेंद्र थोरवे यांनी देखील या बैठकीबाबत कोणतीही कल्पना नव्हती, अशी प्रतिक्रिया दिली आहे.

आमच्यावर वारंवार होणाऱ्या अन्यायाबद्दल न्याय मिळाला पाहिजे. रायगडमध्ये पालकमंत्र्यांचा तिढा अजूनही सुटलेला नाही. आमची आग्रही मागणी आहे की, भरत गोगावले पालकमंत्री व्हायला हवेत, असेही यावेळी आमदार दळवी म्हणाले.

या बैठकीला शिंदे गटाचे आमदार उपस्थित नसल्याने याची चर्चा सुरू झाल्यानंतर आता अजित पवार यांच्या कार्यालयाकडून स्पष्टीकरण देण्यात आले आहे. नाशिक आणि रायगड जिल्ह्याला पालकमंत्री नाहीत म्हणून आम्ही केवळ मंत्र्यांना बैठकीसाठी बोलावले होते. रायगडचे मंत्री म्हणून आदिती तटकरे आणि भरत गोगावले यांना निमंत्रण देण्यात आले होते, असे स्पष्टीकरण अजित पवारांच्या कार्यालयाने दिले आहे.