शिरूर : शिरूर शहरातील मार्वल कम्फर्ट (सुरज) लॉजिंगच्या खोलीत मेफेड्रॉन (एम.डी.) या अंमली पदार्थाची विक्री करण्याच्या उद्देशाने बाळगणाऱ्या दोघांना पुणे ग्रामीण स्थानिक गुन्हे शाखेच्या पथकाने रंगेहात पकडले. बुधवार (दि. १९) रोजी सायंकाळी साडेसहा वाजण्याच्या सुमारास करण्यात आलेल्या या कारवाईत २० ग्रॅम मेफेड्रॉनसह एकूण ९ लाख १० हजार रुपयांचा मुद्देमाल जप्त करण्यात आला आहे.

शिरूरमधील ही धडक दुसरी कारवाई आहे. या प्रकरणी दादा धावडे (वय २७, रा. राजापूर, ता. श्रीगोंदा, जि. अहिल्यानगर) आणि अमोल राजाराम पोटावळे (वय ३५, रा. राजापूर, ता. श्रीगोंदा, जि. अहिल्यानगर) यांच्याविरुद्ध शिरूर पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, शिरूर गावच्या हद्दीतील मार्वल कम्फर्ट (सुरज) लॉजिंगमधील रूम क्रमांक २०९ येथे संशयितांकडे अंमली पदार्थ असल्याची माहिती स्थानिक गुन्हे शाखेला मिळाली होती. त्यानुसार पथकाने तेथे कारवाई केली. झडतीदरम्यान आरोपींच्या ताब्यात २० ग्रॅम वजनाची एम.डी. (मेफेड्रॉन) पावडर आढळून आली. हा अंमली पदार्थ विक्रीच्या उद्देशाने बेकायदेशीररीत्या जवळ बाळगल्याचा पोलिसांचा आरोप आहे.

या कारवाईत पोलिसांनी ४ लाख रुपये किमतीचा २० ग्रॅम मेफेड्रॉन, अमोल पोटावळे याच्याकडील १९ रिकाम्या प्लास्टिकच्या पिशव्या, प्रत्येकी अंदाजे ५ हजार रुपये किमतीचे सॅमसंग ए-३४ ५जी व व्हिवो एक्स-२०० एफई हे दोन मोबाईल फोन तसेच ५ लाख रुपये किमतीची स्कॉर्पिओ कार (एमएच-१६ बीएम-९१००) असा मुद्देमाल जप्त केला आहे. जप्त मुद्देमालाची एकूण किंमत ९ लाख १० हजार रुपये असल्याचे पोलिसांनी सांगितले.

या प्रकरणी शिरूर पोलिस ठाण्यात गुन्हा क्रमांक ७५०/२०२६ अन्वये एनडीपीएस कायद्यातील कलम ८(क), २१(ब), २२(ब) नुसार गुन्हा दाखल करण्यात आला आहे. या कारवाईमुळे शिरूर शहरात अंमली पदार्थांची विक्री करणाऱ्यांचे धाबे दणाणले असून, लॉजिंगमध्ये सुरू असलेल्या अशा गैरप्रकारांवर पोलिसांनी अधिक कडक कारवाई करावी, अशी अपेक्षा नागरिकांकडून व्यक्त होत आहे. अंमली पदार्थांचा पुरवठा नेमका कुठून होत होता आणि या प्रकरणामागे आणखी कोणाचा सहभाग आहे का, याचा तपास पोलिसांकडून सुरू आहे. या प्रकरणाचा पुढील तपास शिरूर पोलिस करीत आहेत.