Rahul Kul – हडपसर–यवत तसेच पुणे- शिरूर मार्गावरील प्रस्तावित उन्नत मार्गांच्या कामामुळे भविष्यात निर्माण होणारी वाहतूक कोंडी टाळण्यासाठी दौंडचे आमदार राहुल कुल यांनी पुढाकार घेत जिल्हाधिकारी कार्यालयात महत्त्वपूर्ण बैठक आयोजित केली. काम सुरू होण्यापूर्वीच नागरिकांना कमीत कमी त्रास व्हावा, यासाठी सहा महिन्यांपासून नियोजन सुरू असल्याची माहिती यावेळी देण्यात आली. पुढील काही दिवसांत या दोन्ही मार्गांवरील उन्नत मार्गांच्या कामास सुरुवात होणार आहे.

या पार्श्वभूमीवर वाहतुकीचे सूक्ष्म नियोजन (मायक्रो प्लॅनिंग) करण्यासाठी आमदार कुल यांनी यापूर्वीही जिल्हाधिकाऱ्यांची भेट घेऊन चर्चा केली होती. त्यानुसार जिल्हाधिकारी यांच्या उपस्थितीत विशेष बैठक पार पडली. बैठकीस भारतीय राष्ट्रीय महामार्ग प्राधिकरणचे प्रकल्प संचालक संजय कदम, महाराष्ट्र राज्य पायाभूत सुविधा विकास महामंडळचे कार्यकारी अभियंता संतोष बंपलवार, सार्वजनिक बांधकाम विभागाचे कार्यकारी अभियंता अमोल पवार, वरिष्ठ अधिकारी उपस्थित होते.

उन्नत मार्गांच्या कामादरम्यान महामार्गावरील वाहतुकीचा भार कमी करण्यासाठी पर्यायी मार्गांचे नियोजन, आवश्यक ठिकाणी रस्त्यांची दुरुस्ती व रुंदीकरण, प्रभावी वाहतूक व्यवस्थापन याबाबत चर्चा करण्यात आली. विकासकामे जलद गतीने पूर्ण करताना प्रवाशांची सुरक्षितता, नागरिकांची गैरसोय टाळण्यासाठी आवश्यक उपाययोजना तातडीने राबविण्याची मागणी आमदार कुल यांनी केली.

स्थानिक नागरिक आणि प्रवाशांचे हित जपत विकासकामांना गती देणे ही प्राथमिकता असल्याचे सांगत आमदार कुल यांनी सर्व विभागांनी परस्पर समन्वयाने काम करण्याचे आवाहन केले. त्यानुसार जिल्हाधिकाऱ्यांनी संबंधित विभागांना तातडीने कृती आराखडा तयार करून काम सुरू करण्याच्या सूचना दिल्या आहेत.

“उन्नत मार्गांचे काम सुरू झाल्यानंतर दोन्ही गजबजलेल्या मार्गांवर मोठ्या प्रमाणात वाहतूक कोंडी होण्याची शक्यता आहे. त्यामुळे नागरिकांना त्रास होऊ नये म्हणून आम्ही सहा महिन्यांपूर्वीच नियोजन सुरू केले. प्रशासनाने आणि संबंधित यंत्रणांनी एकत्रितपणे प्रभावी मायक्रो प्लॅनिंग करावे, अशी मागणी बैठकीत केली असून त्यानुसार अधिकाऱ्यांना तात्काळ कृती आराखडा तयार करण्याचे निर्देश दिले आहेत.
– राहुल कुल, आमदार, दौंड