Radhika Apte: बॉलिवूडमध्ये कामाचे तास कमी करण्यावर सुरू असलेल्या चर्चेत आता अभिनेत्री राधिका आपटेही सहभागी झाली आहे. आई झाल्यानंतर अभिनेत्री दीपिका पादुकोणने ८ तासांच्या शिफ्टची मागणी केली होती. त्याला पाठिंबा देत राधिका आपटेनेही आपली भूमिका स्पष्टपणे मांडली आहे. राधिकाने सांगितले की, निर्माते जर १२ तासांच्या शिफ्टला तयार नसतील, तर ती काम करू शकणार नाही. एका मुलाखतीत राधिका म्हणाली, “१२ तासांची शिफ्ट म्हणजे संपूर्ण शिफ्ट, मेकअप, हेअरस्टाईल सगळं त्यातच समाविष्ट असायला हवं. नाहीतर प्रत्यक्षात आम्हाला १६ तास काम करावं लागतं. सेटवर किमान १४ तास राहावं लागतं आणि त्यात ये-जा करण्यासाठी आणखी दीड-दोन तास जातात.” राधिका पुढे म्हणाली की, १६ तास घराबाहेर राहणं आईसाठी खूप कठीण आहे. “असं केल्यास तुम्हाला तुमच्या मुलाला पाहायलाच वेळ मिळत नाही. अनेकदा वीकेंडलाही सुट्टी मिळत नाही, कधी कधी लंच ब्रेकसुद्धा नसतो. त्यामुळे अशा पद्धतीने काम करणं माझ्यासाठी शक्य नाही,” असं ती म्हणाली. राधिकाने हेही सांगितलं की, आई झाल्यानंतर तिचे ‘सिस्टर मिडनाइट’ आणि ‘साली मोहब्बत’ हे दोन चित्रपट प्रदर्शित झाले आहेत. मात्र, “या वर्षी मला भरपूर कामाच्या ऑफर्स आल्या, पण मी एप्रिलपर्यंत कोणतंही काम स्वीकारत नाहीये. सध्या सर्व ऑफर्स नाकारल्या आहेत. एप्रिलनंतरच मी नव्या कामाचा विचार करेन,” असं तिने स्पष्ट केलं. कामाच्या ठराविक वेळा असाव्यात, जेणेकरून आई असलेल्या अभिनेत्री आपल्या कुटुंबाला आणि मुलांना वेळ देऊ शकतील, अशी अपेक्षा राधिका आपटेने व्यक्त केली आहे.
