पॅरिस : फ्रान्सच्या प्रसिद्ध लुव्र संग्रहालयामध्ये चोरी झाल्याचे रविवारी उघडकीस आले. या चोरीचा तपास करण्यासाठी हे संग्रहालय आज बंद ठेवण्यात आले असल्याचे फ्रान्सच्या सांस्कृतिक मंत्री रचिदा दाती यांनी सोशल मीडियावर केलेल्या पोस्टमध्ये म्हटले आहे. आज सकाळी लूव्र संग्रहालय उघडण्याच्यावेळी ही चोरी झाली, असे दाती यांनी आपल्या पोस्टमध्ये म्हटले आहे. काही अपरिहार्य कारणांमुळे संग्रहालय बंद राहील, असे लुव्र संग्रहालयाने सांगितले . मात्र या दरोड्याबद्दल अधिक माहिती दिली नाही. दरोड्यादरम्यान कोणालाही कोणतीही दुखापत झाल्याचे वृत्त नाही. सांसेक्तिक मंत्री दाती या घटनास्थळी दाखल झाल्या असून या घटनेचा तपास सुरू झाला आहे.जगातील सर्वाधिक भेट दिलेल्या या संग्रहालयात आणि पूर्वीच्या राजवाड्यात गुन्हेगारांनी सीन-मुखी दर्शनी भागातून प्रवेश केला. या भागात सध्या बांधकाम सुरू आहे. अपोलो गॅलरीमधील लक्ष्यित खोलीत थेट प्रवेश मिळविण्यासाठी त्यांनी मालवाहतूक लिफ्टचा वापर केला. खिडक्या फोडल्यानंतर त्यांनी नेपोलियन आणि महाराणीच्या दागिन्यांच्या संग्रहातील नऊ दागिने चोरल्याचे वृत्त आहे. लुव्र संग्रहालयात चोरी आणि दरोड्याच्या प्रयत्नांचा मोठा इतिहास आहे. यातील सर्वात गाजलेला दरोडा १९११ मधील होता. तेंव्हा मोनालिसाचे तैलचित्र फ्रेममधूनच गायब करण्यात आले होते. हे चित्र संग्रहालयात लपून बसलेल्या संग्रहालयाच्या माजी कामगार विन्सेंझो पेरुगियाने चोरले होते. त्याने हे चित्र आपल्या कोटात लपवून पळवून नेले होते. दोन वर्षांनंतर फ्लॉरेन्समध्ये ते सापडले होते. लिओनार्डो दा विंचीचे चित्र त्यानंतरच जगातील सर्वात प्रसिद्ध कलाकृती बनले होते. १९८३ मध्ये लूव्र संग्रहालयातून दोन चिलखते चोरीला गेली आणि जवळजवळ चार दशकांनंतरच ती परत मिळाली होती. या जगप्रसिद्ध संग्रहालयाला दररोज तब्बल ३० हजार पर्यटक भेट देत असतात.
