Helicopter Crash : पर्शियन आखातात हेलिकॉप्टर कोसळून ६ ठारपर्शियन आखातामध्ये कतारच्या सागरी हद्दीमध्ये कताचे हेलिकॉप्टर कोसळून झालेल्या अपघातात ६ जण ठार झाले आहेत. कतारच्या अधिकाऱ्यांनी ही माहिती दिली. या हेलिकॉप्टरमधील एक व्यक्ती अजूनही बेपत्ता असल्याचे कतारच्या गृहमंत्रालयाने म्हटले आहे. ही दुर्घटना शनिवारी हेलिकॉप्टरमधील तांत्रिक बिघाडामुळे झाली होती. पण गृह मंत्रालयाने या तांत्रिक बिघाडाचा तपशील उघड केलेला नाही. तसेच मरण पावणाऱ्यांमध्ये कोणत्या देशाचे नागरिक होते, हे देखील स्पष्ट करण्यात आलेले नाही. यामध्ये कोणी सनदी अथवा लष्करी अधिकारी होते का हे देखील स्पष्ट करण्यात आलेले नाही. कतारच्या गृह मंत्रालयाने दिलेल्या माहितीनुसार, हेलिकॉप्टरमध्ये एकूण ७ प्रवासी असण्याची शक्यता आहे. सहा जणांचे मृतदेह हाती लागले असून, एका बेपत्ता व्यक्तीचा शोध घेण्यासाठी कतारचे नौदल आणि तटरक्षक दल युद्धपातळीवर प्रयत्न करत आहेत. पर्शियन आखातामध्ये व्यावसायिक आणि लष्करी हेलिकॉप्टरची मोठी वाहतूक असते. तांत्रिक बिघाडामुळे झालेली ही मोठी दुर्घटना असून, या प्रकरणाची सखोल चौकशी करण्यासाठी विशेष समिती स्थापन करण्यात येणार असल्याचे संकेत मिळत आहेत.
