मुंबई : भ्रष्टाचार प्रकरणी साध्य तुरुंगात असणारे राज्याचे माजी गृहमंत्री अनिल देशमुख यांना पुन्हा झटका बसला आहे. विशेष सीबीआय न्यायालयाने अनिल देशमुख यांचा जामीन अर्ज फेटाळला असल्याचे सांगण्यात येत आहे. याशिवाय देशमुख यांचे सहकारी कुंदन शिंदे आणि संजीव पालांडे यांचा जामीन अर्जही न्यायालयाने फेटाळला आहे.

सीबीआयने ६० दिवसांच्या अनिवार्य कालावधीत आरोपपत्र दाखल केले नाही आणि नंतर सीबीआयने अपूर्ण आरोपपत्र दाखल केले या कारणास्तव या तिघांनी न्यायलयाकडे जामीन मागितला होता. तसेच सीबीआयने आरोपपत्रासह संबंधित कागदपत्रे सादर केली नसून ती निर्धारित मुदतीनंतर सादर करण्यात आली, असा युक्तिवाददेखील अनिल देशमुखांच्या वकिलांनी केला. मात्र, सीबीआयने या युक्तिवादांना विरोध करत विहित मुदतीत आरोपपत्र दाखल केल्याचे सांगितले.

दरम्यान, कायद्यानुसार आरोपीला अटक केल्यापासून ६० दिवसांच्या आत आरोपपत्र दाखल करावे लागते. मात्र, जर ६० दिवसांच्या आत आरोपपत्र दाखल झाले नाही, तर आरोपींना डिफॉल्ट जामीन मिळू शकतो. मुंबईचे माजी पोलीस आयुक्त परमबीर सिंग यांनी देशमुख यांच्यावर लावलेल्या १०० कोटी रुपयांच्या वसूलीच्या आरोपाखाली सीबीआयने गेल्या महिन्या देशमुखांवर आरोपपत्र दाखल केले होते.

मुंबईचे माजी पोलीस आयुक्त परमबीर सिंग यांनी गेल्या वर्षी मार्चमध्ये देशमुख यांनी पोलीस अधिकाऱ्यांना शहरातील रेस्टॉरंट्स आणि बारमधून दरमहा १०० कोटी रुपये गोळा करण्याचे टार्गेट दिल्याचा आरोप केला होता. देशमुखांनी हा आरोप धुडकावून लावला होता. परंतु मुंबई उच्च न्यायालयाने सीबीआयला अनिल देशमुखांविरोधात गुन्हा नोंदविण्याचे निर्देश दिल्यानंतर देशमुखांनी आपल्या पदाचा राजीनामा दिला.