Purandar Airport | नुकतेच राज्याचे उपमुख्यमंत्री आणि पुणे जिल्ह्याचे पालकमंत्री अजित पवार यांनी बारामती दौरा केला. तालुक्यात आयोजित केलेल्या एका गावातील कार्यक्रमात अजित पवार यांनी पुरंदर विमानतळ, जानाई शिरसाई पाणी योजनेवर भाष्य केले होते. तसेच अजित पवार यांनी विविध ठिकाणी केलेल्या भाषणांमध्ये विमानतळ पुरंदरलाच होणार असल्याचे सांगितले आहे.

यावर माजी न्यायमूर्ती बी. जी कोळसे पाटील यांनी अजित पवारांवर निशाणा साधला आहे. उद्योगपती अदानीच्या होऊ घातलेल्या लॉजिस्टिक पार्कसाठी शेजारीच विमानतळ करणार असेल, तर बारामतीला विमानतळ का करीत नाही? असा सवाल कोळसे पाटील यांनी केला आहे.

वनपुरी (ता. पुरंदर) येथे विमानतळ प्रकल्प बाधित शेतकऱ्यांच्यावतीने विरोध रविवारी आयोजित केलेल्या कार्यक्रमातील निर्धार मेळाव्यात माजी न्यायमूर्ती  बी. जी. कोळसे पाटील हे बोलत होते. या निर्धार मेळाव्याला मोठ्या संख्येने महिला आणि नागरिक उपस्थित होते. आपले संसार, तरुण पिढी वाचवण्यासाठी आपल्याला जमीन जपली पाहिजे, असे देखील ते यावेळी बोलताना म्हणाले.

सर्वांना भिकारी केल्याशिवाय आपली सत्ता येणार नाही हे त्यांना माहिती आहे, अशी घणाघाती टीका कोळसे पाटील यांनी सत्ताधाऱ्यांवर केली. तसेच जाती धर्मात तेढ निर्माण करून जातीय तणाव निर्माण करायची त्यांची नीती असल्याने सर्वांनी एकजूट कायम ठेवा. आपली घरे, जमीन वाचविण्यासाठी जेलमध्ये जाण्याची तयारी ठेवा, असे आवाहन देखील कोळसे पाटील यांनी या मेळाव्यातून केले.

ब्रम्हदेवाचे नाव घेऊन…

पुरंदर तालुक्यात होणारे प्रस्तापित विमानतळ व त्यासाठी होणारे भूसंपादन हे उद्योगपतींच्या घशात घालण्यासाठी असून पालकमंत्री अजित पवार हे त्यासाठी आग्रही आहेत. त्यांनी विविध ठिकाणी झालेल्या कार्यक्रमात ब्रम्हदेव आला तरी विमानतळ पुरंदरलाचा होणार असल्याचे सांगितले आहे. तुम्ही ब्रम्हदेवाचे नाव घेऊन तुम्हाला घाबरवायला निघालेल्यांना पळवून लावा. कोणत्याही परिस्थितीत मोजणी होऊ देऊ नका, अशा शब्दांत कोळसे पाटील यांनी प्रस्तापित पुरंदर विमानतळाला तीव्र शब्दांत विरोध दर्शविला आहे.