पुणे :  पुण्यात सायबर फसवणुकीचा एक धक्कादायक प्रकार समोर आला आहे. कोथरूड येथील एका ३० वर्षीय तरुणाने ऑनलाइन गेमिंगच्या नादात तब्बल ३९ लाख ७७ हजार रुपये गमावले आहेत. यामध्ये क्रिकेटर महेंद्रसिंग धोनी आणि विराट कोहली, उद्योजक अनंत अंबानी यांच्यासह अनेक प्रसिद्ध व्यक्तींचे डीपफेक व्हिडिओंचा वापर करून तरुणाला ‘एव्हिएटर’ गेम खेळण्यास भाग पाडण्यात आले.

सायबर पोलिसांनी भारतीय न्याय संहिताच्या कलम ३१८ (४) आणि ३१९ (२) आणि माहिती तंत्रज्ञान कायद्याच्या संबंधित कलमांखाली एफआयआर दाखल केला. पोलिस उपायुक्त संभाजी कदम आणि त्यांचे पथक या प्रकरणाची चौकशी करीत आहेत. पुण्यात एव्हिएटर गेम फसवणुकीची ही पहिलीच घटना आहे. ऑनलाइन गेम खेळून चांगले उत्पन्न मिळण्याच्या आमिषाने फसवणूक झाल्यानंतर कोथरूड येथील रहिवासी प्रतीक घुगे (३०) यांनी सायबर पोलिसांकडे तक्रार केली. तक्रारदार एका खासगी कंपनीत काम करतो.

पोलिसांनी दिलेल्या माहितीनुसार, २८ नोव्हेंबर २०२४ रोजी प्रतीकच्या व्हॉट्सॲप नंबरवर गेमिंग प्लॅटफॉर्मबद्दलची सूचना पिंग करण्यात आली. त्याला संदेशासह एक ऑनलाइन लिंकदेखील मिळाली. प्रतीकने लिंकवर क्लिक केले आणि पासवर्ड तयार करून स्वतःची नोंदणी केली. सुरुवातीला त्याने एव्हिएटर गेममध्ये दहा हजार रुपये गुंतवले पण त्याला कोणताही परतावा मिळाला नाही, त्यामुळे त्याला आणखी दहा हजार रुपये गुंतवावे लागले. तक्रारदाराने २८ नोव्हेंबर ते ४ डिसेंबर २०२४ दरम्यान ५ लाख ८६ हजार रुपये गुंतवले. त्याला परतावा म्हणून १ लाख रुपये मिळाले.

त्यानंतर पुन्हा परताव्याने प्रोत्साहित होऊन, त्याने पुन्हा गुंतवणूक केली. त्याने ५ नोव्हेंबर ते ११ डिसेंबर २०२४ दरम्यान ८ लाख ३० हजार रुपये गुंतवले त्यावर परतावा म्हणून २ लाख रुपये मिळाले. त्याने परताव्याच्या लोभाने पैसे गुंतवणे सुरूच ठेवले आणि १२ ते १९ डिसेंबर दरम्यान त्याने पुन्हा १२ लाख ८३ हजार रुपये गुंतवले. आश्चर्याची गोष्ट म्हणजे, त्याच्या गुंतवणुकीवर परतावा म्हणून त्याच्या खात्यात १० लाख रुपये मिळाले.

यामुळे त्याला अधिक आत्मविश्वास आला आणि त्याने पुन्हा गुंतवणूक केली. २० डिसेंबर २०२४ ते १५ जानेवारी २०२५ या कालावधीत १२ लाख १३ हजार रुपये गुंतवले. नंतर मात्र त्याला कोणताही परतावा मिळाला नाही. यासाठी तरुणाने त्याच्या बँक खात्याचा आणि क्रेडिट कार्डचा वापर करून सुमारे ३१९ व्यवहार केले, परंतु त्याला फसवणूक होत असल्याचे लक्षात आले नाही. परताव्यासाठी तरुणाने व्हॉट्सॲपद्वारे गेमिंग प्लॅटफॉर्मशी संपर्क साधण्याचा प्रयत्न केला पण तो संपर्क करू शकला नाही. शेवटी त्याने सायबर पोलिस ठाण्यात धाव घेत तक्रार दाखल केली.

एव्हिएटर गेम म्हणजे काय?
एव्हिएटर हा एक ऑनलाइन बेटिंग गेम आहे, ज्यामध्ये विमान उड्डाण करते आणि खेळाडूंना ते गायब होण्यापूर्वी पैसे काढावे लागतात. विमान जितके जास्त वेळ हवेत राहील तितकेच बेटावरील गुणक जास्त असेल. परंतु जर तुम्ही विमान गायब होण्यापूर्वी पैसे काढले नाहीत तर तुम्ही तुमचे सर्व पैसे गमावता. ही गेम व्यसनाधीन बनवण्यासाठी डिझाइन केलेली आहे. अनेकजण पैसे कमविण्याचा जलद मार्ग अशा गेमच्या नादी लागतात.