कोंढवा – शिवसेना प्रमुख स्वर्गीय बाळासाहेब ठाकरे हे आमचे दैवत आहेत तर पक्षप्रमुख उद्धव ठाकरे आमच्या हृदयात आहेत. आत्तापर्यंत त्यांचा आदेश अंतिम मानला आणि महाआघाडीचा धर्म पाळत आलो, कंबर कसून शिवसैनिकांनी महाविकास आघाडीच्या उमेदवाराला जिंकवून आणले, पण परत, परत तेच झाले. हडपसर मतदारसंघात निष्ठावंत शिवसैनिकांना डावलण्यात आले विधानसभेचे तिकिट दिले नाहीच ! कुठवर दुसऱ्याच्या भाकऱ्या शिवसैनिकांनी भाजायच्या? असा रोखठोक सवाल माजी आमदार महादेव बाबर यांनी उपस्थित केला आहे. हडपसर विधानसभा मतदारसंघातील कोंढवा खुर्द- मिठानगर, भाग्योदय नगर,नवाजिश पार्क, स.नं.४२,४३, शिवनेरीनगर, गावठाण व परिसरात अपक्ष उमेदवार गंगाधर बधे यांनी भव्य दुचाकी रॅली आणि पदयात्रेच्या माध्यमातून मतदारांशी संवाद साधला. या पदयात्रेत मार्गदर्शन करताना माजी आमदार महादेव बाबर बोलत होते. यावेळी विविध पक्षातील नाराज गट, अनेक संघटना, मंडळे आणि हजारो मुस्लिम बांधवांनी बधे यांना पाठींबा दर्शविला आहे. यावेळी साईबा ग्रुपचे सदस्य पदाधिकारी, शिवसेना विभाग प्रमुख राजेंद्र बाबर, माजी नगरसेवक तानाजी लोणकर, भरत चौधरी, माजी नगरसेविका मेघा बाबर, प्रसाद बाबर, नदीम शेख, सादिक पटेल, उस्मान शेख, श्रीकांत पवार, प्रदीप पवार यांच्यासह हजारो सर्वधर्मिय नागरिक पदयात्रेत सहभागी झाले होते. सत्ता नसेल, कोणतेही पद नसेल तर, शिवसैनिकांनी नागरीकांच्या समस्या सोडविण्यासाठी कोणाकडे जायचं? आघाडी म्हणतााना? मग त्याचा धर्म सगळ्यांनी पाळायला हवा, पण तसे होताना दिसत नाही म्हणूनच, मी अपक्ष उमेदवार म्हणून अर्ज भरला असल्याचे निष्ठावंत शिवसैनिक गंगाधर बधे यांनी सांगितले.
