Pune Traffic Update – वाहतूक व्यवस्था सुरळित करण्यासाठी पोलिसांनी हाती घेतलेला इंटेलिजंट ट्रॅफिक मॅनेजमेंट सिस्टिम (आयटीएमएस) प्रकल्प अंतिम टप्यात असून आता वाहतूक नियम मोडणाऱ्यांच्या हाती थेट नियमभंगाचे चलन पडणार असल्याचे पुणे पूर्व विभागाचे अतिरिक्त पोलीस आयुक्त मनोज पाटील यांनी सांगितले. सॉफ्टवेअर एक्स्पोर्टर्स असोसिएशन ऑफ पुणे (सीप) तर्फे आयोजित केलेल्या पुणे सोशल इम्पॅक्ट डायलॉग कार्यक्रमावेळी ते बोलत होते. कार्यक्रमाला ग्लोबल सस्टेनिबिलिटी इम्पॅक्ट कोच आणि सेवा ब्रिज फाउंडेशनचे मुख्य कार्यकारी अधिकारी किरण डी. एम, पिनॅकल इंडस्ट्रीजचे आणि ईकेए मोबिलिटीचे संस्थापक अध्यक्ष डॉ. सुधीर मेहता, क्लायमट ट्रूपर्स फाउंडेशनचे मुख्य कार्यकारी अधिकारी सत्या नटराजन, सिम्बायोसिस आंतरराष्ट्रीय विद्यापीठाच्या मेडिकल- हेल्थ सायन्स विभागाचे कुलसचिव प्रो. राजीव येरवडेकर, सीपचे अध्यक्ष शिवराज साबळे, उपाध्यक्ष शिवेश विश्वनाथ, माजी अध्यक्षा विनिता गेरा, व्यवस्थापकीय समिती सदस्य बालचंद्र नामजोशी, ईएसजी विभागाच्या अवंती कदम उपस्थित होते. पाटील म्हणाले, १९९५ मध्ये पुण्यात ८६ चौरस किमी रस्ते होते. २०२५ मध्ये ती संख्या ३७३ चौ. किमी झाली आहे. त्यामध्ये ३३२ टक्क्यांनी वाढ झाली आहे. वाहनांच्या वेगाच्या मर्यादेमध्ये जागतिक पातळीवर पुण्याचा क्रमांक पाचवा आहे. सार्वजनिक वाहतूक व्यवस्था वापरणाऱ्यांचे प्रमाण पुण्यात ११ टक्के आहे. २०१२ मध्ये पीएमपीचा वापर करणारे १२ लाख लोक होते. आजही हा आकडा बदलेला नाही. मेट्रोचा वापर करणारे लोक तीन लाखांपर्यंत आहेत. पुण्यामध्ये खासगी वाहनांची संख्या ७८ लाखांपर्यंत पोहचली आहे. आयटीएमएस कार्यान्वीत झाल्यावर नियम मोडणाऱ्या वाहनचालकांना थेट चलन मिळेल. शहरातील ३२ महत्वाच्या रस्त्यावर काम सुरु केले आहे. यामुळे वाहतूक कोंडीची समस्या कमी होईल, असेही पाटील म्हणाले. सूत्रसंचालन पूजा कुलकर्णी यांनी केले. शिवेश विश्वनाथ यांनी आभार मानले.
