पुणे – बूम बॅरिअरवर लाखो रुपये खर्च करूनही बीआरटी मार्गांतून खासगी वाहतूक सुरूच असल्याचे चित्र आहे. प्रायोगिक तत्वावर बसविलेल्या चारपैकी एकही ठिकाणी बूम बॅरिअर सुरू नाही. तर साठे बिस्कीट बस स्टॉपवरील बूम बॅरिअर गायब झाला आहे. त्यामुळे पीएमपीचा मूळ उद्देशालाच तडा गेल्याचे पाहायला मिळाले आहे. पुणे आणि पिंपरी चिंचवड शहरांत एकूण आठ बीआरटी मार्ग आहेत. त्यात होणारे अपघात आणि घुसखोरी कमी करण्यासाठी पीएमपी प्रशासनाने डेक्कन कॉलेज चौक, जगताप डेअरी चौक, काळेवाडी आणि साठे बिस्कीट बस स्टॉप येथे प्रायोगिक तत्वावर बूम बॅरिअर बसवले आहेत. तर, पिंपरी चिंचवड महापालिकेतर्फे सात ठिकाणी बूम बॅरिअर बसवले आहेत. पण या सर्वच ठिकाणी बूम बॅरिअरचा पुरेसा फायदा होताना दिसत नाही. कारण, यातील बरेच बूम बॅरिअर बंद आहेत. खासगी वाहनचालकांनी नुकसान केल्यामुळे काही मार्गांवरील बूम बॅरिअर काढून टाकले आहेत. प्रायोगिक तत्वावर बसवलेले बूम बॅरिअरचा मूळ उद्देशच सफल होत नसताना अजून 148 ठिकाणी बूम बॅरिअर बसविण्याचा घाट पीएमपी प्रशासनाने घातला आहे. यासाठी आता सात ते आठ कोटी रुपयांचा खर्च प्रस्तावित करण्यात आला आहे. त्यामुळे पीएमपी प्रशासनाच्या कारभारावर नागरिकांकडून प्रश्न चिन्ह उपस्थित केले जात आहे. बीआरटी मार्गांवर पूर्वी खासगी सुरक्षारक्षक नेमण्यात आले होते. तरीदेखील खासगी वाहन चालक त्यांना गुंगारा देऊन बीआरटी मार्गावरून प्रवास करत होते. त्यामुळे बूम बॅरिअर बसविण्याचा निर्णय घेण्यात आला. यासाठी बूम बॅरिअरसाठी प्रत्येकी एक लाख साठ हजार रुपये खर्च करण्यात आला आहे. चार बूम बॅरिअरसाठी आतापर्यंत एकूण 7 रूपये खर्च केले आहेत. तरीदेखील खासगी वाहनचालक बीआरटी मार्गातून प्रवास करत आहेत. यावरून पीएमपी प्रशासनाकडून बीआरटी मार्गावर करण्यात आलेल्या सर्वच उपाययोजना सपशेल फेल ठरताना दिसत आहेत. बीआरटी मार्गावर अजूनही अपघात कमी झालेले नाहीत. तसेच प्रवासासाठी लागणारा वेळ कमी झालेला नाही. बूम बॅरिअर बंदच 1. डेक्कन कॉलेज चौक 2. काळेवाडी 3. जगताप डेअरी चौक
