Pune Temperature – शहरासह जिल्ह्यात उष्णतेच्या पाऱ्याने चाळीशी पार करत आज हंगामातील उच्चांक नोंदविला आहे. लोहगाव येथे सर्वाधिक ४०.४ तर पुरंदर येथे ४०.१ अंश सेल्सिअस कमाल तापमानाची नोंद झाली. दरम्यान, शुक्रवारी (दि. २७) दुपारपर्यंत उन्हाच्या झळांमुळे अंगाची लाहीलाही झाली. त्यामुळे उकाडा वाढलेला होता. दुपारनंतर ढगाळ वातावरण आणि जिल्ह्यातील काही परिसरात पावसाच्या हलक्या सरी पडल्याने वातावरणात बदलले. गेल्या २४ तासांत शहर परिसरात एक तर जिल्ह्यात दीड अंशाने कमाल तापमानात वाढ झाली. परिणामी उष्णतेच्या पाऱ्याने उच्चांक गाठत चाळीशीच्या पुढे मजल मारली आहे. मार्च महिन्याच्या अखेरीस वाढत्या तापमानामुळे उन्हाचा चटका आणि उकाडा नागरिकांना हैराण करत आहे. लोहगाव आणि पुरंदर पाठोपाठ शिवाजीनगर, पाषाण, तळेगाव, कोरेगाव पार्क, मगरपट्टा परिसरात पारा ३८ अंशाच्या पुढे नोंदविला. शुक्रवारी सकाळपासून शहरातील हवामान कोरडे होते. दुपारी बारानंतर उन्हाच्या झळा अंगाची लाहीलाही करत असून, उकाड्याने पुणेकर घामाघूम झाले. दुपारी दोननंतर वातावरणातील बदलामुळे ऊन आणि ढगाळ वातावरणाचा लपंडाव सुरू झाला. दुपारी जिल्ह्याच्या काही भागात वादळी वाऱ्यासह पावसाच्या हलक्या सरी पडल्यामुळे उकाड्यापासून काही क्षणभर दिलासा मिळाला. रात्री पुन्हा उकाडा वाढला होता. दरम्यान, पुढील दोन दिवस शहरासह जिल्ह्यात आकाश निरभ्र आणि ढगाळ वातावरण राहील. त्यानंतर आठवडाभरातील एक ते दोन दिवस शहरासह जिल्ह्यात पावसाच्या हलक्या सरी पडण्याची शक्यता आहे. लोहगाव ४०.४, पुरंदर ४०.१, शिवाजीनगर ३८.५, पाषाण-तळेगाव ३८.३, बारामती ३७.९, वडगावशेरी ३७.८, चिंचवड-हवेली ३७.४, एनडीए ३६.७, शिरूर ३५.६ अंश सेल्सिअस
