पुणे : आरोग्यसेवेकडे पाहण्याचा समग्र दृष्टिकोन आता विकसित झाला आहे. सध्या ३० हजार आयुष्मान आरोग्य मंदिर आहेत आणि आमचे लक्ष्य हे लवकरच १ लाख ७५ हजार आयुष्मान आरोग्य मंदिरे निर्माण करण्याचे आहे, असे मत आरोग्य आणि कुटुंब कल्याण मंत्री जे. पी. नड्डा यांनी सांगितले.

लवळे येथील सिम्बायोसिस रुग्णालय व संशोधन केंद्रातील नेफ्रोलॉजी व यूरोलॉजी सेंटरचे उद्घाटन जे. पी. नड्डा यांच्या हस्ते झाले. यावेळी सिम्बायोसिसचे संस्थापक डॉ. शां. ब. मुजुमदार, डॉ. राजीव येरवडेकर, डॉ. विद्या येरवडेकर आदी उपस्थित होत्या. केंद्र सरकारने सध्याच्या आयुष्मान भारत आरोग्य आणि कल्याण केंद्रांचे नाव बदलून ‘आयुष्मान आरोग्य मंदिर’ असे करण्याचा निर्णय घेतला आहे.

नड्डा म्हणाले, देशात जास्‍तीत जास्‍त आयुष्मान आरोग्य मंदिरे निर्माण करून सर्वसमावेशक प्राथमिक आरोग्य सेवा देता येईल. याद्वारे लोकांच्या आरोग्यावर लक्ष केंद्रित करेल व आरोग्य सेवा देण्यात येईल.

सिम्बायोसिस आरोग्यधाम हे आयुष्मान आरोग्य मंदिराचे एक उत्तम उदाहरण आहे. जिथे रुग्णांना अत्याधुनिक सुविधा या मोफत उपलब्ध आहेत. डॉ. शां. ब. मुजुमदार म्हणाले, भारताला विश्वगुरू बनायचे असेल तर त्याला अध्यात्म आणि वसुधैव कुटुंबकमच्या विचारसरणीचा आधार मिळाला पाहिजे.