प्रभात वृत्तसेवा पुणे, दि. 15 -“पीसीएम’ गटात पुण्यातील अमोघ कुलकर्णी आणि सृजन वाडकर या दोन विद्यार्थ्यांनी शंभर टक्‍के पर्सेन्टाइल गुण प्राप्त केले आहेत. त्याचप्रमाणे “पीसीबी’ गटातही पुण्यातील दोन विद्यार्थ्यांनी यश मिळविले आहेत. शुभम खटकळ आणि वसुधा फडतरे विद्यार्थ्यांनी प्रथम क्रमांकात स्थान पटकावले आहे.

अभियांत्रिकी, औषधनिर्माणशास्त्र आणि कृषी अभ्यासक्रमाच्या प्रवेशासाठी आवश्‍यक असलेली राज्य सामाईक प्रवेश परीक्षा अर्थात “एमएचटी-सीईटी’चा निकाल गुरुवारी जाहीर करण्यात आला. “पीसीएम’ गटात 13 विद्यार्थ्यांनी शंभर टक्‍के पर्सेन्टाईल, तर “पीसीबी’ गटात 14 विद्यार्थ्यांनी शंभर पर्सेन्टाईल मिळविले.

अभियांत्रिकी, औषधनिर्माणशास्त्र आणि कृषी पदवी अभ्यासक्रमांच्या प्रथम वर्ष प्रवेशासाठी “एमएचटी-सीईटी’ घेतली जाते. या सीईटीचा निकाल आज सायंकाळी राज्य सीईटी सेलने जाहीर केला. ही सीईटी भौतिकशास्त्र, रसायनशास्त्र आणि जीवशास्त्र (पीसीबी) आणि भौतिकशास्त्र, रसायनशास्त्र व गणित (पीसीएम) या दोन गटांतून घेण्यात आली. “पीसीएम’ गटातून 2 लाख 31 हजार 264 विद्यार्थी, तर “पीसीबी’ गटातून 2 लाख 36 हजार 115 विद्यार्थी असे एकूण 4 लाख 67 हजार 379 विद्यार्थ्यांनी सीईटी परीक्षा दिली. राज्य सीईटी सेलमार्फत ही सीईटी राज्यातील 36 जिल्ह्यांत 227 परीक्षा केंद्रावर ऑनलाइन पद्धतीने घेण्यात आली.

निकाल राज्य सीईटी सेलच्या संकेतस्थळावर उपलब्ध आहे. “पीसीएम’ गटात 13 विद्यार्थ्यांनी शंभर टक्‍के पर्सेन्टाईल मिळविले असून, त्यात पुण्यातील दोघांचा समावेश आहे. राखीव प्रवर्गातून प्रथम आलेल्या विद्यार्थ्यांची यादी राज्य सीईटी सेलने प्रसिद्ध केले आहे. “पीसीबी’ गटात 14 विद्यार्थी शंभर टक्‍के पर्सेन्टाईल गुण मिळवित राज्यात प्रथम आले आहेत. यातही पुण्यातील दोघे आहे.