पुणे :  वैद्यकीय व अभियांत्रिकी अभ्यासक्रमांसाठी आवश्यक असलेल्या अनुक्रमे NEET व MHT-CET या प्रवेश परीक्षा नुकत्याच पार पडल्या आहेत. त्यामुळे या अभ्यासक्रमांच्या प्रत्यक्ष प्रवेश प्रक्रियेला काही आठवड्यांचा अवधी लागणार आहे. त्यामुळे वेळ वाया जाऊ नये म्हणून विद्यार्थ्यांनी सध्या पदवी अभ्यासक्रमाच्या प्रथम वर्षासाठी प्रवेश निश्चित करावा, असे आवाहन विविध महाविद्यालयांच्या प्राचार्यांनी केले आहे.

यंदा बारावीचा निकाल मे महिन्याच्या पहिल्या आठवड्यात जाहीर झाला असून, पालकांमध्ये मुलांच्या प्रवेशाबाबत उत्सुकता निर्माण झाली आहे. सध्या महाविद्यालयांमध्ये बी.ए., बी.कॉम., बी.एस्सी., तसेच इतर अनेक पदवी अभ्यासक्रमांच्या प्रवेश प्रक्रिया सुरू आहेत. विद्यार्थ्यांकडून संबंधित महाविद्यालयांच्या संकेतस्थळांवरून अर्ज सादर केले जात आहेत. त्यामुळे वर्ग कधी सुरू होतील, याबाबत स्पष्टता नसली, तरी वेळ वाया जाऊ नये म्हणून विद्यार्थ्यांनी प्रवेश घेऊन शैक्षणिक वर्ष वाचवावे, असेही प्राचार्यांनी नमूद केले आहे.

रीतसर प्रवेश रद्द करण्याची सुविधा
वैद्यकीय किंवा अभियांत्रिकी अभ्यासक्रमात प्रवेश मिळाल्यानंतर विद्यार्थ्यांनी पूर्वी घेतलेला पदवी अभ्यासक्रमाचा प्रवेश रीतसर रद्द करता येतो, तसेच विद्यापीठ अनुदान आयोगाच्या (यूजीसी) निर्देशांनुसार महाविद्यालयांना विद्यार्थ्यांकडून घेतलेली संपूर्ण शुल्काची रक्कम परत करणे बंधनकारक आहे. त्यामुळे प्रवेश रद्द करण्याबाबत विद्यार्थ्यांनी संभ्रमात राहू नये.

शैक्षणिक वर्ष वाया जाऊ देऊ नका
विद्यार्थ्यांमध्ये विशिष्ट अभ्यासक्रम व शाखेबाबत आग्रह असतो. काही वेळा आवडती शाखा मिळेपर्यंत दुसऱ्या, तिसऱ्या फेरीची वाट पाहिली जाते. मात्र, अशा प्रतीक्षेत शेवटी कोणताही प्रवेश न मिळण्याची शक्यता असते. त्यामुळे शैक्षणिक वर्ष वाया जाऊ शकते. यासाठी तत्काळ निर्णय घेणे आणि प्रवेश निश्चित करणे महत्त्वाचे आहे.