पुणे – संगम पूल येथील रेल्वे क्रॉसिंगवर मेट्रोकडून स्टील गर्डर टाकण्याच्या कामास रेल्वे प्रशासनाकडून परवानगी मिळाली आहे. त्यामुळे दि. 1 ते 19 जानेवारी 2023 दरम्यान हे काम करण्यात येणार आहे. दरम्यान कामगार पुतळा ते शाहीर अमर शेख चौकाकडे जाण्यास सर्व वाहनांना बंदी असणार आहे. त्यामुळे वाहन चालकांनी पर्यायी मार्गाचा वापर करावा, असे आवाहन वाहतूक पोलिसांनी केले आहे. सिव्हील कोर्ट ते रामवाडी मेट्रो मार्गाचे काम सुरू आहे. त्यासाठी संगमवाडी येथील रेल्वे क्रॉसिंगवर गर्डर टाकण्याचे काम रेल्वेच्या मंजुरीसाठी प्रलंबित होते. ते काम करण्यास रेल्वे प्रशासनाने मेट्रोला परवानगी दिली आहे. एक ते 19 जानेवारी दरम्यान हे वायडक्ट टाकण्याचे काम केले जाणार आहे. त्यासाठी कोर्टाकडून शाहीर अमर शेख चौकाकडे जाणारा रस्ता या कालावधीत बंद राहणार आहे. वाहन चालकांनी सिमला ऑफिस चौक, अभियांत्रिकी महाविद्यालय चौक आणि आरटीओ चौकातून इच्छितस्थळी जावे, असे आवाहन वाहतूक पोलिसांनी केले आहे. संगमवाडी येथील रेल्वे क्रॉसिंगवर काम करण्यास रेल्वेने परवानगी दिली आहे. पुढील वीस दिवसांमध्ये हे काम पूर्ण केले जाणार आहे. त्यासाठी आवश्यक ते ब्लॉक मिळाले आहेत. या कामासाठी योग्य नियोजन केल आहे. दरम्यान हे काम छोटे-छोटे ब्लॉक घेऊन केले जाणार आहे. -हेमंत सोनवणे, जनसंपर्क अधिकारी, महामेट्रो रेल्वे क्रॉसिंगवर काम करण्यास मेट्रोला परवानगी दिली आहे. मेट्रोकडून टप्प्या-टप्पयाने काम केले जाणार आहे. त्यामुळे रेल्वे गाड्यांना कोणतीही अडचण येणार नाही. -मनोज झंवर, जनसंपर्क अधिकारी, पुणे रेल्वे विभाग
