पुणे – शिवाजीनगर येथील एसटी स्थानक पूर्वीच्याच ठिकाणी उभारण्याचा निर्णय झाला आहे. मेट्रो आणि एसटी प्रशासन यांच्यातील बैठकीत हा निर्णय झाला. तळमजल्यावर एसटीचा डेपो आणि त्यावर एसटी स्थानक मेट्रोकडून बांधून देण्यात येणार आहे. हे स्थानक दोन वर्षांत पूर्ण करण्याचे नियोजन आहे. मेट्रोचे काम सुरू झाल्यानंतर शिवाजीनगर एसटी स्थानक कोणी उभारायचे, यावर एसटी आणि मेट्रो प्रशासन एकमेकांकडे बोट दाखवत होते. पण, अर्थसंकल्पीय अधिवेशनात हा प्रश्न उपस्थित झाला होता. त्यानंतर तातडीने मेट्रो आणि एसटी यांच्यात बैठक झाली. आता हे एसटी स्थानक कसे असावे, तेथील इंटिग्रेटेड ट्रान्सपोर्ट हब आणि कमर्शियल कॉम्लेक्स यावर दोन्ही अधिकाऱ्यांची चर्चा झाली आहे. या एसटी स्थानक पूर्ण करण्यासाठी साधारण 650 कोटी रुपये लागणार आहेत. त्याचा आराखडा तयार करण्यात आला आहे. त्यामध्ये तळमजल्यावर एसटीचा डेपो आणि वर एसटी स्थानक असेल. पण, त्यावरील मल्टिकॉम्पलेक, निधी कसा उभा करायचा या गोष्टींवर सध्या मेट्रो व एसटी यांच्यात चर्चा सुरू आहे.
