पुणे, -पीएमपी प्रशासनाने ई-बसेसची संख्या वाढविली असली तरी उपनगरीय मार्गांवर अद्यापही अशा बसेसची संख्या कमी आहे. लॉंग रूटवर अशा बसेसचा वापर अधिक आहे. सध्या, उन्हाळी सुट्ट्या, लग्न समारंभ यासह सणवार, साप्ताहिक सुट्ट्या अशा दिवशी उपनगरीय मार्गांवरील बसेसचे वेळापत्रक कोलमडत आहे. यामागे अशा मार्गांवर स्क्रॅप स्थितीत असलेल्या बस सोडण्याचे प्रमाण अधिक असल्याचे कारण समोर येत आहे. याबाबत हडपसर आगारातील सुत्रांकडून माहिती घेतली असता, गेली दोन वर्षे पाठपुरावा सुरू असूनही पीएमपी प्रशासनाला पुणे महापालिकेकडून नव्या बस उपलब्ध करून देण्यात आलेल्या नाहीत. त्यामुळे ज्या उपलब्ध होत आहेत त्या इतर मार्गांवर तर उपनगरीय अंतर्गत भागात स्क्रॅप स्थितीतील बसचा वापर पीएमपी प्रशासनाला करावा लागत असल्याचे सांगण्यात आले. मुदत संपूनही वापर…. उपनगरीय भागात पीएमपी बसचे ब्रेकडाउनचे प्रमाण अधिक आहे. वापराची मुदत संपलेली असतानाही अशा बस प्रवासी सेवेसाठी वापरल्या जात असल्याने असे प्रकार घडत आहेत. बस 10 वर्षे वापरलेली असेल तर ती सेवेतून बाद करणे गरजेचे असताना 12 वर्षे होऊनही 327 बसेस अद्यापही सेवेत आहेत. 266 बसेसला 10 वर्षे पूर्ण होण्यासाठी काही महिन्यांचा कालावधी शिल्लक राहिलेला आहे. अशा बसेसच ब्रेकडाउन होण्याचे प्रमाण अधिक आहे.पीएमपीच्या ताफ्यातील अवघ्या 1000 बसच सध्या सुस्थितीत आहेत. ब्रेकडाउनचे प्रमाण अधिक… पीएमपीच्या अनेक “स्क्रॅप’ बस अद्यापही सेवेत असून त्या निरंतर धावत असल्याने ब्रेकडाउनचे प्रमाण गेल्या काही महिन्यांत वाढले आहे. मागील तीन महिन्यांत पीएमपीच्या स्वतःच्या मालकीच्या व ठेकेदारांच्या अशा एकूण 2891 बस ब्रेकडाउन झाल्या आहेत. तसेच यातील दररोज सुमारे 32 ते 35 बस ब्रेकडाउन होऊन बंद असल्याने याचा परिणाम प्रवासी सेवेवर होत आहे. …म्हणून प्रवासी उभे एका महिन्यांत बस पाच वेळा बंद पडली तर ती सेवेतून तात्पुरती बाद केली जाते. याचे प्रमाण गेल्या एक-दोन महिन्यांत वाढले आहे. बस बाद झाल्यास दुरूस्ती होऊन तिला पुन्हा प्रवासीसेवेत येण्यासाठी 15 दिवस ते एक महिन्याचा कालावधी लागतो. तोपर्यंत ती इतर बसवर प्रवाशांचा भार येत असल्याने बसचे वेळापत्रकही कोलमडत आहे. याच कारणातून प्रवाशांना बसमधून उभे राहून प्रवास करणाऱ्या प्रवाशांची संख्या अधिक आहे. उपनगरीय रस्त्यांवर प्रामुख्याने जुन्या बसेस सोडण्यात येतात. ई-बसेस सोडण्याचे प्रमाण खूपच कमी आहे. अशा बसेस रस्त्यामध्येच बंद पडत असल्याने प्रवाशांना योग्य सेवा देता येत नाही, ही वस्तुस्थिती आहे. – एक बसचालक,हडपसर स्थानक, पुणे पुणे महापालिकेकडे नवीन बसेसची मागणी केलेली आहे. परंतु, सध्या नव्या आलेल्या तसेच अधिकच्या नव्या बसेसाठी आवश्यक तो निधी मिळालेला नाही. नवीन बस आल्यानंतर प्रवासी सेवा आणखी सुधारेल. – प्रज्ञा पवार,सह व्यवस्थापकीय संचालक, पीएमपी
