पुणे (निमोणे) – घोडगंगा सहकारी साखर कारखान्याचा 15 महिन्याचा पगार थकल्याने तीन कामगारांनी घोडगंगा कारखान्याच्या 300 फुटावर असलेल्या धुराड्याच्या चिमणीवर चढून शोले स्टाईल अनोखे आंदोलन केले आहे. सकाळी 10 वाजल्यापासून हे कामगार कारखान्याच्या चिमणीवर चढले होते. महेंद्र काशीद, तात्यासाहेब शेलार व संतोष तांबे असे आंदोलन करणाऱ्या कामगारांचे नाव आहे.अखेर हे कामगार आयुक्त यांच्यासोबत बैठक लावण्याचे आश्वासन दिल्यानंतर सायंकाळी 6:30 च्या सुमारास खाली उतरले. या कामगारांनी खाली उतरावे यासाठी घोडगंगा कारखान्याचे विद्यमान संचालक दादा पाटील फराटे, शिरुर तालुका राष्ट्रवादीचे तालुकाध्यक्ष रविंद्र काळे, घोडगंगाचे माजी संचालक सुधीर फराटे, भाजपचे जिल्ह्याचे नेते राजेंद्र कोरेकर, भारतीय जनता पार्टी किसन मोर्चा प्रदेश कार्यकारणी सदस्य सुभाष कांडगे, श्रीनिवास घाडगे, एकनाथ शेलार, राजेंद्र गारगोटे, शिरुरचे उपविभाग अधिकारी प्रशांत ढोले, शिरुर पोलीस स्टेशनचे पोलिस निरीक्षक ज्योतीराम गुंजवटे, त्यांचे सर्व सहकारी, अग्निशामक दलाचे जवान व सर्व कामगार या ठिकाणी थांबून त्यांना खाली येण्याची विनंती करत होते. परंतु हे तीनही कामगार ऐकण्याच्या मनःस्थितीत नव्हते. परंतु कारखान्याचे विद्यमान संचालक दादा पाटील फराटे, शिरुर तालुका राष्ट्रवादीचे तालुकाध्यक्ष रविंद्र काळे, घोडगंगाचे माजी संचालक सुधीर फराटे, भाजपचे जिल्ह्याचे नेते राजेंद्र कोरेकर या सर्वांनी या कामगारांची समजुत काढत कामगार आयुक्तांसोबत बैठक घेण्याचे आश्वासन दिल्यानंतर हे तीनही कामगार सायंकाळी 6:30 च्या सुमारास कारखान्याच्या धुराड्याच्या चिमणीवरुन खाली उतरले. त्यामुळे उपस्थित सर्वांनीच सुटकेचा निश्वास सोडला.
