Pune News : पुणे ग्रामीण पोलिस भरती प्रक्रियेसाठी सुरू असलेल्या खरेदी प्रक्रियेत गंभीर अनियमितता झाल्याचा आरोप बहुजन मुक्ती पार्टीने केला आहे. शासनाच्या नियमांनुसार साहित्य खरेदी प्रक्रिया GeM (Government e-Marketplace) या अधिकृत पोर्टलवरून करणे बंधनकारक असताना संबंधित विभागाने ही प्रक्रिया वेगळ्या पद्धतीने राबविल्याचा दावा करण्यात आला आहे. पक्षाचे राष्ट्रीय अध्यक्ष दासराम नायक, महाराष्ट्र प्रदेशाध्यक्ष प्रतापदादा पाटील, तसेच पुणे शहराध्यक्ष बजरंग राजगुरू यांच्या वतीने पुणे ग्रामीण पोलिस अधिक्षकांना निवेदन देण्यात आले आहे. मुदत केवळ १ दिवस – संशय अधिक गडद निवेदनात नमूद केल्याप्रमाणे, काही साहित्यांच्या दरपत्रकासाठी केवळ एक दिवसाची मुदत देण्यात आली. शासन नियमांनुसार अशी मुदत किमान ७ दिवसांची असणे आवश्यक असल्याचे पक्षाचे म्हणणे आहे. कमी मुदत देणे ही जाणीवपूर्वक केलेली बाब असून त्यामुळे पारदर्शकतेवर प्रश्नचिन्ह निर्माण होत असल्याचा आरोप करण्यात आला आहे. दरपत्रक मागविण्याची पद्धत आणि अल्प मुदत यामुळे काही निवडक पुरवठादारांना लाभ देण्याचा प्रयत्न असू शकतो, असा संशय व्यक्त करण्यात आला आहे. “ही प्रक्रिया जाणूनबुजून चुकीच्या पद्धतीने राबवली जात असून यामध्ये भ्रष्टाचाराची शक्यता आहे,” असे निवेदनात म्हटले आहे. पक्षाने प्रशासनाकडे खालील मागण्या केल्या आहेत : सध्या सुरू असलेली दरप्रक्रिया त्वरित रद्द करावी नव्याने जाहिरात देऊन किमान ७ दिवसांची मुदत द्यावी संबंधित अधिकाऱ्यांची चौकशी करून निलंबनाची कारवाई करावी शासनाच्या मार्गदर्शक सूचनांनुसारच संपूर्ण प्रक्रिया पार पाडावी मागण्यांकडे दुर्लक्ष झाल्यास बहुजन मुक्ती पार्टीच्या वतीने तीव्र आंदोलन छेडण्यात येईल, असा इशाराही देण्यात आला आहे.
