कात्रज – कात्रज, धनकवडी परिसरात पावसाने वाऱ्यासह हजेरी लावली. दुपारनंतर हळूहळू ढग जमा झाले व संध्याकाळी सुरू झालेल्या पावसाने नागरिकांची तारांबळ उडाली. आंबेगाव पठार, सुखसागर नगर, दत्तनगर, आंबेगाव बु, भारती विद्यापीठ, संतोष नगर, गोकुळ नगर, जांभूळवाडी, कोळेवाडी, भिलारेवाडी, गुजर निंबाळकरवाडी यासह अनेक भागांमध्ये पावसाच्या हलक्या सरी कोसळल्या.

सुमारे अर्धा ते पाऊण तास पाऊस पडला. ०४:३० वाजल्यानंतर हळूहळू ढग दाटून येऊन विजांच्या कडकडाटासह पावसाच्या सरी कोसळल्या, अनेक ठिकाणी रस्त्याच्या बाजूला पाणी साचले होते. संध्याकाळी ०५:३०च्या सुमारास अंधार पडल्यासारखे वातावरण झाले.

पावसाने उघडीप दिल्यानंतर रस्ता निसरडा झाल्याने कात्रज डेअरी येथील रस्त्यावर अनेक दुचाकीस्वार घसरून पडले. येथील उतार कमी केला गेल्याचा दावा मनपा प्रशासन करीत असले तरी रंबलर नसल्याने पाण्यामुळे दुचाकी घसरत होत्या. अवकाळी पावसामुळे संध्याकाळी गारवा निर्माण झाला, त्यामुळे उकाड्याने हैराण झालेल्या नागरिकांना सुखद अनुभव मिळाला. रात्री उशिरापर्यंत विजांच्या कडकडांचा आवाज येत होता.