Pune Fire News : पुणे रेल्वे स्टेशन येथील फलाट क्रमांक एकवरील एका हॉटेलमध्ये सोमवारी अचानक आग लागल्याची घटना घडली. घटनेमुळे काही काळ परिसरात घबराट पसरली होती. मात्र अग्निशमन दलाच्या तात्काळ हस्तक्षेपामुळे मोठी दुर्घटना टळली. मिळालेल्या माहितीनुसार, फलाट क्रमांक एकवरील खाद्यपदार्थांच्या हॉटेलमध्ये शॉर्टसर्किटमुळे आग लागल्याचा प्राथमिक अंदाज व्यक्त करण्यात येत आहे. धुराचे लोट बाहेर येऊ लागल्याने प्रवासी व विक्रेत्यांमध्ये भीतीचे वातावरण निर्माण झाले. स्टेशन प्रशासनाने तत्काळ सतर्कता बाळगत परिसर रिकामा केला. घटनेची माहिती मिळताच अग्निशमन दलाच्या गाड्या काही मिनिटांत घटनास्थळी दाखल झाल्या. जवानांनी तत्परतेने पाण्याचा मारा करत आगीवर नियंत्रण मिळवले. सुदैवाने या घटनेत कोणतीही जीवितहानी झाली नसून कोणालाही दुखापत झालेली नाही. आगीत हॉटेलमधील काही साहित्य व उपकरणांचे नुकसान झाले आहे. घटनेनंतर रेल्वे प्रशासनाने सुरक्षेच्या दृष्टीने विद्युत यंत्रणेची तपासणी सुरू केली असून पुढील चौकशी केली जात आहे. दरम्यान, फलाटावरील रेल्वे वाहतूक काही काळ सावधगिरी म्हणून नियंत्रित करण्यात आली होती. मात्र परिस्थिती सुरळीत झाल्यानंतर वाहतूक पूर्ववत करण्यात आली.
