पुणे – कोंढवा परिसरात अवैध दारूविक्रीवर कारवाई करण्यासाठी गेलेल्या पोलिसांच्या पथकाला धक्कादायक बाब समोर आली आहे. कारवाईदरम्यान एका ठिकाणी बंद कपाटाची तपासणी केली असता त्यामध्ये तब्बल कोट्यवधी रुपयांची रोख रक्कम आढळून आली. अचानक सापडलेल्या या मोठ्या रकमेने पोलिसांसह परिसरातही खळबळ उडाली आहे. पोलिसांनी मिळालेल्या माहितीनुसार संबंधित ठिकाणी अवैध दारू साठा आणि विक्री सुरू असल्याची माहिती मिळाल्यानंतर कोंढवा पोलिसांनी छापा टाकला. छाप्यादरम्यान दारूसाठ्यासोबतच एका बंद कपाटात मोठ्या प्रमाणात रोख रक्कम ठेवलेली आढळून आली. सदर रक्कम नेमकी कोणाची आहे आणि तिचा अवैध व्यवसायाशी काय संबंध आहे, याचा तपास सुरू करण्यात आला आहे. या प्रकरणी पोलिसांनी संबंधित व्यक्तींना ताब्यात घेतले असून, रोख रक्कम जप्त करण्यात आली आहे. आर्थिक व्यवहार, दारू माफिया नेटवर्क आणि इतर गुन्हेगारी संबंधांचा तपास सुरू असून, आवश्यक त्या कलमान्वये गुन्हा दाखल करण्याची प्रक्रिया सुरू आहे. पुढील तपास कोंढवा पोलीस करत आहेत.
